Bakı. Musa Əhmədov - APA-Economics. Azərbaycanda son 5 il ərzində mobil sektor üzrə gəlirlər 30%, abunəçi bazası isə 50% artıb. Rabitə və Yüksək Texnologiyalar Nazirliyindən “APA-Economics”ə verilən məlumata görə, bu barədə “Rabitə və İnformasiya Texnologiyaları Nazirliyi - 2013” adlı illik hesabatda bildirilir.
Hesabatda qeyd olunur ki, mobil rabitə sektorda dinamik inkişaf edən sahədir.
Belə ki, 2013-cü ildə mobil sektor üzrə gəlirlər əvvəlki ilə nisbətdə müqayisəli qiymətlərlə 17,4% artaraq 1 150,6 mln. ABŞ dollarına çatıb. Mobil sahədə əldə olunan gəlirlər telekommunikasiya sektorunun 64,6%-ni təşkil edir. Mobil telefon rabitəsi xidmətləri ölkənin əhali yaşayan ərazisini tam əhatə edir və bu, regionda 100%-lik ilk nəticədir.
“Ölkənin İKT sektorunda mobil rabitə həm gəlirlərdəki payına, həm də inkişaf tempinə görə aparıcı mövqeyə malikdir. Mobil rabitə sahəsində GSM standartında 3 mobil operator fəaliyyət göstərir. Hazırda ölkədə 100 nəfərə düşən mobil abunəçilərin sayı 110-dur. Bu da dünya orta göstəricisindən 14,3% çoxdur”. Ölkədə mobil genişzolaqlı internet bazarı da sürətli inkişaf mərhələsindədir. 2009-cu ildən “3G” texnologiyasının, 2012-ci ildən etibarən isə “4G” texnologiyasının tətbiqinə başlanılıb. 2013-cü ildə mobil abunəçilərin 41%-i həm də mobil geniszolaqlı internet istifadəçisi olub”, - deyə hesabatda bildirilir.
Qeyd edək ki, 2013-cü ildə İKT sektorunda əldə olunmuş gəlirlərin 1 782 mln. dolları və ya 89,1%-i telekommunikasiya sektorunun payına düşür. 2013-cü ildə telekommunikasiya sektorunda əldə olunan gəlirlərin 64,6%-i mobil rabitə, 20,3%-i sabit şəbəkə, 7,2%-i isə internet sahəsi üzrə formalaşıb. Telekommunikasiya sektorunun inkişafının əsas hərəkətverici qüvvəsi rolunda mobil rabitə və internet xidmətləri çıxış edir.
Belə ki, 2013-cü ildə real artım tempi internet bazarında 45%, mobil sektorda 17,4% olub.
Bizi Telegram-da izləyin
t.me/apa_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
