İnfrastruktur

Ana səhifə

İnfrastruktur

Azərbaycanın nəqliyyat sektorunda sərnişin və yük daşımaları artıb

24 avqust 2013 16:56 (UTC +04:00)

Qeyri-neft yüklərinin həcmi 5,2% artaraq 84,6 mln. tona çatıb. Nəqliyyat vasitələri ilə daşınmış yüklərin 56%-i avtonəqliyyat, 27,6%-i boru kəməri, 10,7%-i dəmir yolu, 5,7%-i dəniz nəqliyyatı vasitələri ilə həyata keçirilib. Bu barədə «APA-Economics»ə Dövlət Statistika Komitəsindən məlumat verilib.

Qeyri-dövlət bölməsində yük daşınması 4,1% artıb, bu bölməyə məxsus nəqliyyat vasitələri ilə yük daşınmasının payı nəqliyyat sektorunda 72,9% təşkil edib. Analoji dövrdə nəqliyyatçılar 956,6 mln. nəfərə və ya əvvəlki ilin eyni dövrü ilə müqayisədə 7,8% çox sərnişinə xidmət göstəriblər. Sərnişinlərin 87,2%-i avtomobil, 12,5%-i metro nəqliyyatının xidmətlərindən istifadə ediblər.

Qeyd edək ki, dəmir yolu nəqliyyatı ilə 7 ay ərzində 13,1 mln. ton yük daşınıb. Orta hesabla sutkada 656 vaqon yüklənib, 571 vaqon boşaldılıb. Sutka ərzində dəmir yolunun Şimal istiqaməti üzrə 24,7 min ton, Qərb istiqaməti üzrə 6,3 min ton və Cənub istiqaməti üzrə 5,9 min ton yüklənmə işi yerinə yetirilib.

Dəniz nəqliyyatında isə daşınmış yüklərin həcmi 6,9 mln. ton təşkil edib. Yüklərin 58,1%-ni neft yükləri, 41,9%-ni isə quru yüklər təşkil edib və bütün daşımalar xarici əlaqələr üzrə həyata keçirilib. Dəniz limanlarında 7 mln. ton yükləmə-boşaltma işləri həyata keçirilib və 3,1% azalma müşahidə olunub. İşlənmiş yüklərin 85,4%-ni beynəlxalq tranzit yüklər təşkil edib. Bu il iyulun 1-i vəziyyətinə limanlarda göndərilmək üçün 1,6% çox idxal yüklərin qalığı olub.

Nəqliyyat sektorunda daşımaların həcminə görə ən böyük paya malik olan avtomobil nəqliyyatı ilə hesabat dövründə 68,3 mln. ton yük, 834,5 mln. sərnişin daşınıb və əvvəlki ilin eyni dövrü ilə müqayisədə müvafiq olaraq 6,8% və 8,3% artım qeydə alınıb. Sərnişinlərin 96,3%-i avtobus, 3,7%-i isə minik taksilərinin xidmətlərindən istifadə ediblər. Yük dövriyyəsi 6,9%, sərnişin dövriyyəsi isə 9,2% artıb.

Metro nəqliyyatının xidmətlərindən istifadə etmiş sərnişinlərin sayı 119,8 mln. nəfər olmaqla 5% artıb.

Hava nəqliyyatı ilə 921,8 min və ya 5,8% çox sərnişin daşınıb, daşınmanın 99,3%-i dövlət, 0,7%-i isə özəl müəssisələrə məxsus hava gəmiləri ilə həyata keçirilib. Bu nəqliyyat növü ilə yükdaşıma 1,9 dəfə artaraq 64,5 min tona çatıb.