Bakı. Fərid Mirzəyev – APA. “Ölkədə əvvəlki illərlə nisbətdə tədarük olunan qanın həcmi artıb. Səhiyyə Nazirliyinin təşkilatçılığı 2015-ci ildə respublika üzrə keçirilən qanvermə aksiyalarında 36 ton 597 litr qan tədarük edilib. 2014-cü ildə isə bu göstərici 36 ton 193 litr olub”.
Bu barədə APA-ya Səhiyyə Nazirliyinin mətbuat xidmətindən bildirilib. Məlumatda qeyd olunub ki, qanvermə aksiyalarında iştirak edən könüllü donorların sayı artır: “2015-ci ildə qanvermə aksiyalarında 75184 nəfər iştirak etmişdisə, 2014-cü ildə bu rəqəm 72697 nəfər olub. Donor qanının əksər hissəsi Mərkəzi Qan Bankında, Milli Onkologiya Mərkəzində və Respublika Kliniki Tibbi Mərkəzdə toplanıb”.
Qeyd olunub ki, ümumilikdə, 2015-ci ildə, Aşura günü keçirilən tədbirlər nəzərə alınmadan, 318 qanvermə aksiyası keçirilib: “Tədarük olunan qan və komponentlərindən hemofiliyalı və talassemiyalı xəstələrə, həmçinin qana ehtiyacı olan bütün şəxslərin müalicəsində istifadə olunur. Səhiyyə Nazirliyinin təşkilatçılığı ilə Bakı və regionlarda könüllü qanvermə aksiyaları davam edir”.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
