Sənaye və energetika

Ana səhifə

SOCAR: Qaz Emalı Kompleksi ilə bağlı xarici investorlarla danışıqlar aparmağa hazırıq

30 may 2018 09:34 (UTC +04:00)

"SOCAR-ın fəaliyyət istiqamətləri neft-qaz hasilatı və nəqli ilə məhdudlaşmır".

“APA-Economics”in məlumatına görə, bunu bu gün Bakıda keçirilən “Xəzər Neft və Qaz-2018” 25-ci Yubiley Beynəlxalq konfransında SOCAR prezidenti Rövnəq Abdullayev deyib. Onun sözlərinə görə, Azərbaycanın karbohidrogen ehtiyatları emal və kimya sənayesinin inkişafı üçün mühüm stimuldur: "Bu gün SOCAR emal və kimya sənayesinə öz töhfəsini verməklə, neft və qaz sənayesindən əldə etdiyi gəlirlərə əlavə dəyər qatır. Bu istiqamətdə gerçəkləşdirilən layihələr mövcud sənaye müəssisələrimizlə inteqrasiya ediləcək və onların effektivliyi daha da artırılacaq. Respublikamızda neft-qaz emalı və kimya sənayesi ölkə iqtisadiyyatının artan templərinə uyğun olaraq durmadan inkişaf edir. Heydər Əliyev adına Neft Emalı Zavodu və “Azərikimya” İB-də mövcud emal və neft-kimya qurğularının modernləşdirilməsi, yenidən qurulması, yeni qurğuların inşa olunması məqsədi ilə aparılan tədbirlər məhsulların kəmiyyət və keyfiyyət göstəricilərinin yüksəldilməsinə, Avropa standartlarına uyğunlaşdırılmasına xidmət edir. SOCAR eyni zamanda ölkədə istehsal olunan neft və qaz emalı məhsullarının çeşidinin artırılması üçün yeni layihələr icra edir. Artıq bu il istismara veriləcək SOCAR Polymer, Karbamid zavodu, Türkiyədə STAR neft emalı zavodu layihələri iqtisadiyyatımızın şaxələndirilməsi, aqrar sənayenin və qeyri-neft sektorunun inkişafı, habelə region bazarlarının etibarlı təminatı baxımından əhəmiyyətli rola malikdir".

R.Abdullayev bildirib ki, Sumqayıt Kimya Sənaye Parkının tərkibində yaradılan SOCAR Polimer layihəsi çərçivəsində, ölkəmizdə əvvəllər istehsal olunmayan, lakin dünya bazarlarında böyük tələbat duyulan polipropilen və yüksək sıxlıqlı polietilen istehsalı üçün yeni qurğular quraşdırılır. SOCAR prezidenti qeyd edib ki, zavodda istehsal ediləcək polimer məhsulları müxtəlif istehlak məhsullarının istehsalı üçün xammal kimi istifadə ediləcək, bu da öz növbəsində, ölkə daxilində orta və kiçik sahibkarlığın inkişafı üçün münbit şərait yaradacaq: "Həmçinin cari ildə Yeni Qaz Emalı Kompleksinin tikintisinə başlanması planlaşdırılır. Kompleksdə təbii qaz, xüsusən də səmt qazı karbon qazından təmizlənəcək. C2+ fraksiyalar qazın tərkibindən ayrılaraq polimer məhsullarının istehsalı üçün istifadə ediləcək, təmizlənmiş yanacaq qazı isə ölkə təsərrüfatına veriləcək. Yeni Qaz Emalı Kompleksi ilə bağlı xarici investorlarla aparılan danışıqlarda layihəyə böyük maraq müşahidə edilir. Bu layihəyə maraq göstərən yeni tərəfdaşlarla da danışıqlar aparmağa hazırıq".