Maliyyə

Ana səhifə

Maliyyə

Bu ilik ilk yarısında Azərbaycan müdafiə xərclərinə 48% çox vəsait yönəldib

06 avqust 2008 08:06 (UTC +04:00)

Bakı. Nicat Mustafayev – APA-Economics. Bu ilin yanvar-iyun ayları ərzində Azərbaycanın xarici ticarət dövriyyəsi ötən ilin müvafiq dövrü ilə müqayisədə 4,1 dəfə, o cümlədən ixrac 6,9 dəfə artıb. «APA-Economics»in məlumatına görə, bu barədə Azərbaycan hökumətinin 2008-ci ilin ilk yarısının yekunlarına həsr olunmuş iclasında maliyyə naziri Samir Şərifov bildirib.

S. Şərifov qeyd edib ki, hesabat dövründə dövlətin ümumi valyuta ehtiyatları cari ilin əvvəlinə nisbətən 80,5% və ya 5,8 mlrd. ABŞ dolları artaraq 13 mlrd. dollardan çox olub. «Hesabat dövründə bütün mənbələr hesabına əsas kapitala yönəldilən investisiyaların həcmi 31,6% artıb», - deyə S. Şərifov bildirib.
S.Şərifovun sözlərinə görə, bu il dövlət büdcəsinin gəlirləri 3,92 mlrd. manat və ya təsdiq olunmuş büdcəyə nisbətən 41,8% artırılaraq 10,484 mlrd. manat, xərcləri 2,542 mlrd. manat və ya təsdiq olunmuş büdcəyə nisbətən 29,8% artırılaraq 11,61 mlrd. manata çatdırılıb.

«İcmal büdcədə aparılmış dəqiqləşdirmə ilə onun gəlirləri təsdiq olunmuş büdcəyə nisbətən 66,4% artırılaraq 17,465 mlrd. manat, xərcləri təsdiq olunmuş büdcəyə nisbətən 25,3% artırılaraq 12,744 mlrd. manat həddinə gətirilib», - deyə S. Şərifov bildirib. Nazir, həmçinin qeyd edib ki, altı ayda dövlət büdcəsinin mədaxili 4,81 mlrd. manat və ya 111,3% yerinə yetirilib ki, bu da ötən ilin eyni dövrü ilə müqayisədə 2,227 mlrd. manat və ya 86,3% çoxdur: «Vergilər Nazirliyi mədaxil proqnozunu 107,6% icra etməklə, ona 2007-ci ilin eyni dövrünə nisbətən 955 mln. manat və ya 49,3% çox, Dövlət Gömrük Komitəsi 100,3% və ya ötən ilin eyni dövrü ilə müqayisədə 197 mln. manat və yaxud 53,8% çox əməl edib».

S. Şərifovun sözlərinə görə, Vergilər Nazirliyi xətti ilə qeyri-neft sektorundan büdcəyə 1,63 mlrd. manat vəsait daxil olub ki, bu da 2007-ci ilin müvafiq dövrünə nisbətən 312 mln. manat və ya 41,5% çoxdur. Dövlət Neft Fondundan büdcəyə proqnozda nəzərdə tutulduğundan 290 mln. manat və ya 29,6% çox transfer edilib. Büdcə təşkilatlarının büdcədənkənar vəsaitləri üzrə 29 mln. manat vəsait daxil olub ki, bu da ötən ilin eyni dövrünə nisbətən 16 mln. manat çoxdur.
«Altı ay ərzində dövlət büdcəsinin xərcləri 4,95 mlrd. manat və ya 88,9% icra olunub ki, bu da ötən ilin analoji dövrü ilə müqayisədə 1,81 mlrd. manat və ya 79,2% çoxdur», - deyə nazir bildirib.

S. Şərifovun sözlərinə görə, 2007-ci ilin müvafiq dövrünə nisbətən bu ilin altı ayında dövlət büdcəsindən sənaye və tikinti xərclərinə 2,8 dəfə, nəqliyyat və rabitə xərclərinə 86,7%, mənzil-kommunal təsərrüfatı xərclərinə 70,8%, mədəniyyət xərclərinə 50,5%, müdafiə xərclərinə 48,4%, səhiyyə xərclərinə 31,3%, təhsil xərclərinə 27,9%, kənd təsərrüfatı xərclərinə 26,4%, sosial müdafiə və sosial təminat xərclərinə 26,3% çox vəsait yönəldilib: «Bu ilin altı ayı ərzində icmal büdcənin gəlirləri 8,707 mlrd. manat, xərcləri 4,593 mlrd. manat icra olunub. Nəticədə icmal büdcədə 4,114 mlrd. manat profisit yaranıb».

Samir_Şərifov