Maliyyə

Ana səhifə

Maliyyə

Azərbaycanın dövlət büdcəsindən dövlət investisiya xərclərinə yönəldilən maliyyə vəsaiti 3 dəfə artıb

06 avqust 2008 09:07 (UTC +04:00)

Bakı. Nicat Mustafayev – APA-Economics. Bu ilin altı ayı ərzində Azərbaycanın dövlət büdcəsindən dövlət investisiya xərclərinə 1,918 mlrd. manat vəsait yönəldilib. «APA-Economics»in məlumatına görə, Azərbaycan hökumətinin 2008-ci ilin ilk yarısının yekunlarına həsr olunmuş iclasında çıxış edən maliyyə naziri Samir Şərifov bildirib ki, bu, 2007-ci ilin müvafiq dövrünə nisbətən 1,283 mlrd. manat və ya 3 dəfə çoxdur: «Həmin vəsaitlərdən sosial-mədəni və məişət təyinatlı obyektlərin tikintisinə və yenidən qurulmasına 275 mln. manat, o cümlədən yeni məktəblərin, əlavə sinif otaqlarının və uşaq bağçalarının tikintisinə 95 mln. manat, yeni xəstəxanaların, ambulatoriyaların, təcili tibbi yardım stansiyalarının tikintisinə, əsaslı təmirinə və digər səhiyyə tədbirlərinə 48 mln. manat, yeni mədəniyyət müəssisələrinin tikintisi və yenidən qurulmasına 78 mln. manat, regionlarda müasir idman komplekslərinin tikintisinə və yenidənqurma işlərinə 28 mln. manat, şəhid ailələrinin pulsuz mənzillə təmin edilməsi üçün isə 2,4 mln. manat vəsait sərf olunub».

S. Şərifov, həmçinin qeyd edib ki, əsas kommunal və nəqliyyat infrastrukturlarının tikintisi və yenidən qurulması üçün 1,323 mlrd manat, o cümlədən elektrik stansiyalarının tikintisi üçün 207 mln. manat, regionların içməli su təminatı, suvarma-drenaj infrastrukturlarının bərpası və yenidən qurulması üçün 109 mln. manat, respublika əhəmiyyətli avtomobil yollarının və yol infrastrukturunun tikintisi üçün 746 mln. manat, Zaqatala və Lənkəran hava limanlarının yenidən qurulması üçün 28 mln. manat, Bakı Metropoliteninin «İçərişəhər» stansiyasının yenidən qurulmasına, «Şimal» istiqamətində yeni metro bağlantısının və stansiyaların tikintisinə və yeni metro vaqonlarının alınmasına 75 mln. manat vəsait yönəldilib.

«Cari ilin ötən dövrü ərzində icmal büdcənin tərkib hissəsi olan Dövlət Neft Fondu tərəfindən ümumi dəyəri 132,1 mln. manat məbləğində məcburi köçkünlər üçün yaşayış qəsəbələrinin tikintisi, Samur-Abşeron suvarma sisteminin yenidən qurulması, Oğuz-Qəbələ-Bakı su kəmərinin, Bakı-Tbilisi-Qars dəmir yolunun çəkilişi layihələrinin həyata keçirilməsi xərcləri maliyyələşdirilib», - deyə S. Şərifov vurğulayıb.

Samir_Şərifov