Maliyyə

Ana səhifə

Maliyyə

Beynəlxalq Sığorta Şirkəti yeni regional filial açacaq

03 sentyabr 2008 10:16 (UTC +04:00)

Bakı. Elnur Hüseynquluyev – APA-Economics. Azərbaycanın Beynəlxalq Sığorta Şirkəti (BSŞ) 2008-ci ilin sonunda Lənkəran rayonunda filial açmağı planlaşdırır.
BSŞ-nin satış və marketinq departamentinin direktoru Elşad Əliyevin «APA-Economics»ə verdiyi məlumata görə, şirkətin filial və nümayəndəlikləri Azərbaycan Beynəlxalq Bankının (ABB) regionlarda yerləşən filiallarının nəzdində açılır. Bu baxımdan da şirkətin yeni filialı ABB-nin Lənkəran filialının açılmasından asılı olacaq və bu proses bu ilin sonunadək tamamlanacaq.
Qeyd edək ki, hazırda şirkətin respublika üzrə 4 filialı mövcuddur. Bunların 2-si Bakıda, 2-si isə regionda (Şəki və Gəncə) yerləşir.
Xatırladaq ki, təsisçisi Azərbaycan Beynəlxalq Bankı olan BSŞ 2002-ci ildən fəaliyyət göstərir. Cari ilin yanvar-iyun aylarında şirkətin sığorta daxilolmalarının həcmi 9,35 mln. manat, ödənişləri isə 1 mln. manat olub. Şirkətin respublika üzrə ümumi sığorta haqlarında xüsusi çəkisi 9,55%, ödənişlərdə isə 4,54% təşkil edib. Hazırda şirkət 29 könüllü və 4 icbari sığorta növü üzrə xidmət göstərir.