Maliyyə

Ana səhifə

Maliyyə

Bakıda «Azərbaycanda lizinqin inkişafı: mövcud vəziyyət və perspektivlər» mövzusunda dəyirmi masa keçirilir

21 aprel 2009 08:53 (UTC +04:00)

Bakı. Nicat Mustafayev – APA-Economics. Bu gün Bakıda Dünya Bankı Qrupunun üzvü olan Beynəlxalq Maliyyə Korporasiyası (IFC) və Azərbaycan Lizinq Şirkətləri Assosiasiyasının təşkilatçılığı (ALŞA) ilə «Azərbaycanda lizinqin inkişafı: mövcud vəziyyət və perspektivlər» mövzusunda dəyirmi masa keçirilir.
«APA-Economics»in məlumatına görə, tədbirin əsas məqsədi ölkədə lizinqin inkişafını stimullaşdırmaq üçün mövcud vəziyyəti müzakirə etmək, sektorun inkişafına dair təkliflər vermək və lizinq sektoruna daxili və xarici investisiyaların qoyuluşuna təkan verməkdir.
Tədbirdə çıxış edən IFC-nin Azərbaycandakı nümayəndəsi xanım Aliyə Əzimova qeyd edib ki, IFC lizinq sahəsində Azərbaycanda iki layihə həyata keçirib. Bunlardan biri «Azərbaycanda lizinq bazarının inkişafı Layihəsi» (2003-2007-ci illər), digəri isə «Azərbaycan-Orta Asiya Lizinq Fondunun məsləhət xidmətləri Layihəsi»dir (2005-2009-cu illər).
Tədbirin ölkənin lizinq sektorunun inkişafına təkan verəcəyini bildirən A.Əzimova qeyd edib ki, 2003-cü ildən etibarən IFC Azərbaycanın lizinq sektoruna 6 mln. ABŞ dolları həcmində kredit ayırıb, İsveçrə İqtisadi Məsələlər üzrə Dövlət Katibliyi (SECO) tərəfindən isə 3 mln. dollar məbləğində texniki yardım göstərilib: «Ayırdığımız vəsait Azərbaycanda lizinq portfelinin kifayət qədər artmasına səbəb olub».
Toplantıda çıxış edən IFC-nin layihə meneceri xanım Anastasiya Marina bildirib ki, son 3 il ərzində Azərbaycanda lizinq portfeli 67 mln. dollar artaraq 200 mln. dolları üstələyib: «Bizim layihələr artıq başa çatmaq üzrədir və biz ümid edirik ki, Azərbaycan hökuməti ölkədə lizinq sektorunun inkişafını davam etdirəcək».
Tədbirdə çıxış edən SECO-nun Azərbaycandakı nümayəndəsi Nailə Səfərova öz növbəsində qeyd edib ki, ötən dövr ərzində SECO Azərbaycanın maliyyə sektoruna 8 mln. dollar vəsait ayırıb.
Qeyd edək ki, dəyirmi masada bir sıra dövlət rəsmisi, beynəlxalq təşkilat və Azərbaycanın lizinq şirkətlərinin nümayəndələri iştirak edir.