Maliyyə

Ana səhifə

Maliyyə

Azərbaycan dövlət büdcəsinin mədaxil hissəsi yanvar-mart aylarında 92% səviyyəsində icra olunub

23 aprel 2009 10:32 (UTC +04:00)

Bakı. Vüqar İsrafilov – APA-Economics. Azərbaycan dövlət büdcəsinin gəlirləri 2009-cu ilin yanvar-mart aylarında 2 522 mln. manat təşkil edib. Bu barədə ölkə prezidenti yanında milli iqtisadiyyatın bu ilin ilk rübündə inkişafına həsr olunan hökumət müşavirəsində iqtisadi inkişaf naziri Şahin Mustafayev məlumat verib.

«APA-Economics»in bildirdiyinə görə, nazir 2009-cu ilin birinci rübündə dövlət büdcəsinin gəlirlər hissəsinin 92% səviyyəsində yerinə yetirildiyini vurğulayıb. Onun sözlərinə görə, ötən ilin eyni dövrü ilə müqayisədə büdcə gəlirləri 537,6 mln. manat və ya 27,1% artıb. Ş.Mustafayev həmçinin bildirib ki, büdcənin xərcləri yanvar-mart aylarında 2 345 mln. manat və ya 97,9% səviyyəsində icra edilib. Bu, ötən ilin müvafiq dövrünə nisbətən 972 mln. manat və ya 70,8% çoxdur. Nazir qeyd edib ki, bu il ərzində hökumət əhalinin sosial müdafiəsinin gücləndirilməsi tədbirlərini davam etdirərək bu məqsədlə büdcə xərclərini ötən ilin eyni dövrü ilə müqayisədə 42,6% və ya 245 mln. manat artırıb. Bu kimi tədbirlərə 820 mln. manat və ya ümumi büdcə xərclərinin 35%-i xərclənib.

Beləliklə, büdcə gəlirləri və xərclərinin icrasında cari ilin aprelin 1-nə həcmi 177 mln. manat olan profisit yaranıb. Onun ölkə üzrə ÜDM-in həcminə qarşı nisbəti isə cəmi 2,6% təşkil edib. Xatırladaq ki, 2008-ci ilin yanvar-mart aylarında büdcə gəlirlərinin artımı 82,6% və yaxud 1 984,4 mln. manat olub, xərclər isə həmin dövrdə 64,5% artaraq 1 372,5 mln. manata bərabər çatıb. Ötən ilin ilk rübündə büdcənin icrasında yaranan 611,9 mln. manatlıq profisit ÜDM-in 7,5%-nə bərabər olub.