Maliyyə

Ana səhifə

Maliyyə

Arif Vəliyev: «Maliyyə böhranı Azərbaycana ciddi təsir etməyib»

24 aprel 2009 09:50 (UTC +04:00)

Bakı. Nicat Mustafayev – APA-Economics. Bu gün Dövlət Statistika Komitəsinin (DSK) sədri Arif Vəliyevin iştirakı ilə Azərbaycanın 2009-cu ilin I rübü üzrə makroiqtisadi göstəricilərinə dair mətbuat konfransı keçirilib.
«APA-Economics»in məlumatına görə, tədbir çərçivəsində A.Vəliyev qeyd edib ki, bu ilin yanvar-mart ayları ərzində Azərbaycanda ümumi daxili məhsulun (ÜDM) həcmi 6,7 mlrd. manat təşkil edib və bu, keçən ilin analoji dövrü ilə müqayisədə faktiki qiymətlərlə 4,1% çoxdur: «Bu ilin I rübündə ÜDM-in əhalinin hər nəfərinə düşən həcmi ötən ilin analoji dövrü ilə müqayisədə 2,9% artıb və 782 manat (971,5 ABŞ dolları) təşkil edib».
A.Vəliyev onu da bildirib ki, dünya bazarında neftin qiymətinin ucuzlaşması ilə əlaqədar hasilatın bir qədər azaldılması nəticəsində Azərbaycanın neft sektorunda məhsul istehsalı ötən ilin birinci rübü ilə müqayisədə 2,1% azalıb. Bununla yanaşı, qeyri-neft sektorunda əlavə dəyər 13,7% artıb.
Ölkənin digər makroiqtisadi göstəricilərinə gəldikdə isə A.Vəliyev vurğulayıb ki, cari ilin ilk rübündə kənd təsərrüfatı məhsulu istehsalı 4,3%, əsas kapitala investisiya qoyuluşu 15,2%, nəqliyyatla yük daşınması 1,1%, rabitə xidmətləri 5,3%, əmtəə dövriyyəsi 10%, pullu xidmətlər isə 20,5% artıb.
DSK sədri həmçinin bildirib ki, ölkə əhalisinin Azərbaycanda milli valyutanın devalvasiyasından ehtiyatlanaraq banklardakı vəsaitlərini geri götürməsinə baxmayaraq, əhalinin banklarda yerləşdirdiyi əmanətlərin həcmi keçən ilin müvafiq dövrü ilə müqayisədə 16% artaraq mart ayının 1-nə 1,8 mlrd. manata çatıb. Milli valyuta ilə vəsait qoyuluşu 12%, xarici valyuta ilə isə 19,5% artaraq müvafiq olaraq 816,4 mln. və 997 mln. manat olub.
Dövlət büdcəsinin daxilolmalarına gəldikdə isə A.Vəliyev qeyd edib ki, cari ilin ilk üç ayı ərzində dövlət büdcəsinə 2,5 mlrd. manat vəsait daxil olub və 2,3 mlrd. manat xərclənib: «Nəticədə, büdcənin icrasında 0,2 mlrd. manat həcmində profisit yaranıb. Profisitin ÜDM-də xüsusi çəkisi isə 2,6% təşkil edib».
Tədbirin sonunda qlobal maliyyə böhranının Azərbaycana da müəyyən təsirindən danışan A.Vəliyev qeyd edib ki, ölkədə ÜDM-in artımı böhranın Azərbaycana ciddi təsir etmədiyini göstərir.