Maliyyə

Ana səhifə

Maliyyə

«Azərdəmiryolbank»ın Müşahidə Şurasının iclası keçirilib

27 aprel 2009 08:34 (UTC +04:00)

Bakı. Elnur Hüseynquluyev – APA-Economics. Azərbaycanın «Azərdəmiryolbank» Səhmdar Kommersiya Bankı (SKB) Müşahidə Şurasının iclası keçirilib. Bankın baş ofisindən «APA-Economics»ə verilən məlumata görə, iclasda həmçinin «Azərdəmiryolbank» SKB-nin xarici səhmdarları olan Avropa Yenidənqurma və İnkişaf Bankından (EBRD) İ.Manaqadze və Hollandiyanın Maliyyə İnkişaf Korporasiyasından (FMO) D.Snayders iştirak edib.
Toplantıda bankın İdarə Heyətinin 2008-ci ildə fəaliyyətinin nəticələri təsdiq olunub, həmçinin 2009-cu il üzrə maliyyə planları, bankın institusional inkişaf sahəsində apardığı fəaliyyət, xüsusən korporativ idarəetmə, risklərin və likvidliyin idarə olunması, marketinq və informasiya texnologiyaları sahəsindəki işlər əsas müzakirə obyekti olub.
Hesabatın nəticələrinə görə, Müşahidə Şurasının üzvləri bankın 2008-ci il üçün biznes planının vacib maliyyə göstəricilərinin, o cümlədən aktivlərin 52,4%, kredit portfelinin 63,6% və depozit portfelinin 61,5% artdığını bildiriblər.
Eyni zamanda, Direktorlar Şurasına böhran şəraitindən bütün çıxış yolları göstərilərək «Maliyyə böhranının yaranacağı halda icra olunan Tədbirlər Planı» təqdim edilib. İclasda qeyd olunub ki, bu gün bankın böhran vəziyyətinə düşməsi üçün heç bir əsas yoxdur. Qeyd edək ki, «Azərdəmiryolbank» bu cür tədbirlər planı hazırlayan ilk banklardan biridir.
Xatırladaq ki, «Azərdəmiryolbank» SKB-nin 850-yə yaxın səhmdarı mövcuddur. Bankın nizamnamə kapitalında «25%+1 səhm» iştirak paketi Avropa Yenidənqurma və İnkişaf Bankına (EBRD), 10% Hollandiyanın Maliyyə İnkişaf Korporasiyasına (FMO), 10% hüquqi şəxslərə, qalanı isə fiziki şəxslərə məxsusdur. «Azərdəmiryolbank» SKB 1989-cu ildə təsis edilib və hazırda bankın respublika üzrə 28 filialı fəaliyyət göstərir.
Cari ilin yanvar ayının 1-nə bankın aktivlərinin həcmi 224,698 mln. manat, kredit portfeli 168,592 mln. manat, depozit portfeli 49,497 mln. manat, məcmu kapitalı 37,398 mln. manat, o cümlədən nizamnamə kapitalı 13,40 mln. manat təşkil edib.