Maliyyə

Ana səhifə

Maliyyə

Azərbaycanda Neft Fondundan dövlət büdcəsinə transfert artırılmayacaq

27 aprel 2009 14:02 (UTC +04:00)

Bakı. Vahab Rzayev – APA-Economics. Cari ilin birinci rübü ərzində Azərbaycan Dövlət Neft Fondundan (ARDNF) dövlət büdcəsinə transfertin həcmi 1,330 mlrd. manat təşkil edib. «APA-Economics» xəbər verdiyi kimi, bu barədə Neft Fondunun icraçı direktoru Şahmar Mövsümov məlumat verib.
Ş.Mövsümov vurğulayıb ki, bu transfertlər Maliyyə Nazirliyi tərəfindən təqdim edilmiş qrafik əsasında həyata keçirilib və transfertin həcmi nəzərdə tutulan miqdarda olub. İcraçı direktor həmçinin vurğulayıb ki, bu il Neft Fondundan dövlət büdcəsinə transfertlərin həcminin artırılması məsələsi gündəmdə yoxdur, yəni Fonddan dövlət büdcəsinə köçürmələr artırılmayacaq.
Eyni zamanda mütəxəssislər tərəfindən neftin ucuzlaşması ilə əlaqədar olaraq dövlət büdcəsinin xərclərinin icrasında yarana biləcək problemlərin həlli yolu kimi büdcə kəsiri ilə yanaşı ARDNF-dən transfertlərin artıracağı söylənilir. Hətta hökumətin bütün səviyyələrində büdcə xərclərinin azaldılmayacağı bildirilir. Lakin dövlət büdcəsinə transfertlərin artırılmayacağı barədə Ş.Mövsümovun qəti bəyanatını nəzərə alaraq, belə qənaətə gəlmək olar ki, Neft Fondunun 2009-cu il büdcəsinin hazırlanması zamanı il ərzində neftin qiymətinin düşməsi, dünya maliyyə və iqtisadi böhranın mənfi təsiri kimi amillərə görə dövlət büdcəsinə təsirin kəmiyyəti təhlil olunub və artıq Fondun transfertlərində öz əksini tapıb.
Qeyd edək ki, ARDNF-in 2009-cu il büdcəsinə əsasən, dövlət büdcəsinə transfertin ümumi həcmi 4,915 mlrd. manat səviyyəsində planlaşdırılıb. Yəni, ilin I rübündə ümumi transfertin 27%-i həyata keçirilib. Müqayisə üçün bildirək ki, 2009-cu ildə büdcəyə nəzərdə tutulmuş transfertin həcmi 2008-ci ilin faktiki və proqnozlaşdırılan göstəricisindən 1,115 mlrd. manat və ya 29,3% çoxdur.