Maliyyə

Ana səhifə

Maliyyə

IFC «AccessBank»a uzunmüddətli kredit ayırıb

27 aprel 2009 15:30 (UTC +04:00)

Bakı. Nicat Mustafayev – APA-Economics. Dünya Bankı qrupunun üzvü olan Beynəlxalq Maliyyə Korporasiyası (IFC) Azərbaycanın «AccessBank» Səhmdar Kommersiya Bankına (SKB) 15 mln. ABŞ dolları məbləğində kredit ayırıb.

IFC-nin Bakı ofisindən «APA-Economics»ə verilən məlumata görə, bu vəsait ölkənin müvafiq bank xidmətləri ilə kifayət qədər təmin olunmayan bölgələrində mikro və kiçik müəssisələrin maliyyə vəsaitlərinə çıxış imkanlarını artırmağa kömək edəcək: «AccessBank»a verilən uzunmüddətli kredit IFC-nin ölkə iqtisadiyyatının aparıcı qüvvəsi olan həssas kiçik sahibkarlara daha çox diqqətin ayrılması strategiyasına uyğundur».

Xatırladaq ki, «AccessBank» SKB 2002-ci ilin oktyabr ayında Azərbaycan Mikromaliyyələşdirmə Bankı kimi fəaliyyətə başlayıb. Ötən ilin sentyabr ayında bankın brendi dəyişdirilib. Bankın təsisçiləri rolunda Avropa Yenidənqurma və İnkişaf Bankı (20%), Beynəlxalq Maliyyə Korporasiyası (20%), Qara Dəniz Ticarət və İnkişaf Bankı (20%), Almaniyanın KfW Bankı (20%), «AccessHolding» (16,53%) və «LFS Financial Systems GmbH.» şirkəti (3,47%) çıxış edir.

Cari ilin yanvar ayının 1-nə bankın aktivlərinin həcmi 198,863 mln. manat, kredit portfeli 165,941 mln. manat, depozit portfeli 17,279 mln. manat, məcmu kapitalı 42,863 mln. manat, o cümlədən nizamnamə kapitalı 20 mln. manat təşkil edib. Bankın ölkə üzrə 19 filialı, 19 bankomatı və 40 POS-terminalı fəaliyyət göstərir.

Qeyd edək ki, Azərbaycan 1995-ci ildən IFC-nin üzvüdür. Bu günədək IFC ölkədəki 40 layihəyə öz vəsaitlərindən 300 mln. dollardan artıq və sindikatlaşdırılmış kredit şəklində 104 mln. dollar həcmində vəsait yönəldib.