Maliyyə

Ana səhifə

Maliyyə

Azərbaycanda məcmu bank aktivləri əvvəlindən 14% azalıb

28 aprel 2009 12:29 (UTC +04:00)

Bakı. Vüqar İsrafilov – APA-Economics. Azərbaycanda fəaliyyət göstərən bank təşkilatlarının məcmu aktivləri 2009-cu ilin yanvar-mart aylarında 1 458,5 mln. manat və ya 14,20% azalaraq aprelin 1-nə 8 814,96 mln. manat təşkil edib. Bu barədə «APA-Economics»ə Azərbaycan Mərkəzi Bankından (AMB) məlumat verilib.

AMB-nin statistik hesabatlarına əsasən, təkcə mart ayında bankların məcmu aktivləri 664,13 mln. manat və ya 7,01% azalıb. Azalmanın əsas səbəbləri investisiyaların və müştərilərə banklar tərəfindən verilən kreditlərin azalması ilə bağlıdır. Bank investisiyaları bu ilin ilk rübündə 14,27% azalaraq 678,7 mln. manata düşüb. Son bir ayda müştəri borcalmalarının həcmi 466,87 mln. manat, ilin əvvəlindən isə 984 mln. manat azalıb. Bu zaman kreditlərin bank aktivlərindəki payı aprelin 1-nə 66,17% təşkil edib. Müştəri borcalmalarının azalmasına baxmayaraq, bankların maliyyə sektoruna verdiyi kreditlərin həcmi bu il artmaqdadır. Belə ki, ilin əvvəlindən bu növ kreditlərin həcmi 5,6% artaraq aprelin əvvəlinə 438,02 mln. manata çatıb və bank aktivlərinin 4,97%-nə bərabər olub. Maraqlıdır ki, nağd və müxbir hesablarda olan vəsaitlərin məcmu aktivlərdə xüsusi çəkisi ilin əvvəlindən 13,82%-dən 11,24%-ə enib.

Qeyd etmək lazımdır ki, bu ilin yanvar-mart aylarında bank passivlərinin məcmu həcmində kapitalın payı 20,27%-ə çatıb, onların ümumi həcmi isə ilk dəfə olaraq 1 787,22 mln. manat təşkil edib. Son bir ayda bank kapitalının həcmi 17,85 mln. manat və ya 1,01%, ilin əvvəlindən isə 82,82 mln. manat və ya 4,86% artıb. Eyni zamanda, passivlərdə müştəri depozitlərinin payının azalması davam edib və rüb ərzində 39,47%-dən 36,52%-ə düşüb. Bu növ depozitlərin həcmi ilin əvvəlindən 836,31 mln. manat və ya 20,62% azalaraq aprelin 1-nə 3 218,78 mln. manat təşkil edib. Bununla bərabər, bankların maliyyə sektorundan cəlb etdiyi depozitlər ilin əvvəlindən 336,87 mln. manat və ya 10,32% azalaraq aprelin 1-nə 2 928,50 mln. manata bərabər olub.