Maliyyə

Ana səhifə

Maliyyə

Azərbaycan üzrə ÜDM-in məcmu həcmində qeyri-neft sektorunun payı son bir ildə təxminən 2 dəfə artıb

29 aprel 2009 12:30 (UTC +04:00)

Bakı. Vüqar İsrafilov – APA-Economics. Azərbaycan iqtisadiyyatının qeyri-neft sahələrində istehsal olunan Ümumi Daxili Məhsulun (ÜDM) həcmi 2009-cu ilin yanvar-mart aylarında ötən ilin eyni dövrünə nisbətən 13,7% artaraq 3 549,3 mln. manat təşkil edib. Bu barədə «APA-Economics»ə Azərbaycan Mərkəzi Bankının (AMB) Statistika Departamentindən məlumat verilib.

AMB-nin hesablamalarına görə, ötən ay qeyri-neft ÜDM-in həcmi 1 469,6 mln. manat artıb və ötən ilin mart dinamikasına nisbətən müqayisəli qiymətlər nəzərə alınmadan 1,7 dəfə çoxalıb. Bu zaman, adambaşına düşən qeyri-neft ÜDM-in həcmi 170,46 manat və yaxud 211,76 ABŞ dollarına bərabər olub, halbuki orta hesabla ölkənin hər bir sakini üzrə məcmu ÜDM-in istehsalı 782 manat və ya 971,5 dollara bərabər olub. Eyni zamanda, qeyri-neft sahələrinin məcmu ÜDM-də payı I rübün yekununda 52,65%-ə çatıb. Qeyd edək ki, ötən ilin ilk rübündə bu göstərici 29,12%, ötən ilin sonunda isə 38,81% səviyyəsində olub.

Beləliklə, qeyri-neft sahələrində müşahidə olunan ÜDM-in artım tempinin daha çox olması nəticəsində (3-4 dəfə) onların məcmu əsas makroiqtisadi göstəricisində xüsusi çəkisi son bir ildə 1,87 dəfə artıb. Dünya bazarında neftin qiymətinin ucuzlaşması ilə əlaqədar hasilatın bir qədər azaldılması nəticəsində Azərbaycan iqtisadiyyatının neft sektorunda məhsul istehsalı ötən ilin I rübü ilə müqayisədə 2,1% azalıb, lakin qeyri-neft sahələrində əlavə dəyərin artması ÜDM istehsalının 4,1% artmasını təmin edib.

Xatırladaq ki, Dövlət Statistika Komitəsinin məlumatına görə, ilin əvvəlindən Azərbaycan iqtisadiyyatında yaradılan əlavə dəyərin həcmi 6 741,8 mln. manat təşkil edib.