Maliyyə

Ana səhifə

Maliyyə

«Bank Respublika» daha üç filial açmağa hazırlaşır

30 aprel 2009 12:43 (UTC +04:00)

Bakı. Elnur Hüseynquluyev – APA-Economics. Azərbaycanın «Bank Respublika» Səhmdar Kommersiya Bankı (SKB) bu ilin sonunadək daha 5 filial açmaq niyyətindədir. Bunu «APA-Economics»ə açıqlamasında bankın İdarə Heyətinin üzvü Aqşin Əmirov bildirib.
A.Əmirovun sözlərinə görə, bankın strateji planına uyğun olaraq, bütün yeni filialların regionda (Sabirabad, Zaqatala, Qax, Şamaxı və İmişli) açılması nəzərdə tutulub: «Həmin filiallar üçün müvafiq rayonlarda yer alınıb və hazırda tikinti işləri aparılır. İlkin olaraq bu ilin yay aylarında Sabirabad, İmişli və Şamaxı filialları istifadəyə veriləcək. Bununla bağlı yaxın vaxtlarda həmin filialların təsis sənədləri Azərbaycan Mərkəzi Bankına təqdim ediləcək».
A.Əmirov bildirib ki, filiallarla yanaşı bu il ərzində bankın ATM və POS-terminal şəbəkəsinin genişləndirilməsi planlaşdırılır. Belə ki, il ərzində bank tərəfindən əlavə 20 bankomat quraşdırılacaq və ATM-lərin ümumi sayı 50-yə çatdırılacaq. POS-terminallara isə tələbat bir qədər aşağıdır.
Xatırladaq ki, «Bank Respublika» SKB 1992-ci ildən fəaliyyət göstərir. Almaniyanın DEG İnvestisiya Korporasiyası və «Sparkassen International Development Trust» şirkəti 2005-ci ilin aprel ayında bankın nizamnamə kapitalında «25%+1 səhm» iştirak payı alıb.
Cari ilin yanvar ayının 1-nə bankın aktivlərinin həcmi 387,875 mln. manat, kredit portfeli 260,367 mln. manat, depozit portfeli 135,816 mln. manat, məcmu kapitalı 43,299 mln. manat, o cümlədən nizamnamə kapitalı 22,580 mln. manat təşkil edib.
Hazırda «Bank Respublika»nın ölkə ərazisində 32 filial və şöbəsi fəaliyyət göstərir.