Maliyyə

Ana səhifə

Maliyyə

ATİB: Azərbaycanda lizinq şirkətlərinin kapitallaşma səviyyəsi çox aşağıdır

01 may 2009 08:20 (UTC +04:00)

Bakı. Nicat Mustafayev – APA-Economics. Azərbaycanda lizinq şirkətləri çox zəif kapitallaşma səviyyəsinə malikdir. Qiymətli kağızlar bazarı zəif inkişaf etdiyinə görə, bu şirkətlər fəaliyyətini əsas etibarı ilə bank kreditləri hesabına qurur. «APA-Economics»in məlumatına görə, bu barədə Azərbaycan-Türkiyə İş Adamları Birliyinin (ATİB) hazırladığı hesabatda bildirilir.
Hesabatda qeyd olunur ki, məhz bu səbəbdən banklar tərəfindən yaradılan lizinq şirkətləri daha aktiv fəaliyyət göstərir, lakin son dövrlər bank sektorunda yaşananlar lizinq sektorunun maliyyələşməsinə də mənfi təsir etməyə başlayıb: «Lizinq bazarının inkişafına idxal olunan lizinq obyekti olan mallara ƏDV-nin tətbiq edilməsi, lizinq sahəsinin kifayət qədər tənzimlənməməsi, lizinqə verilən əmlak üçün «sürətli amortizasiya» metodunun tətbiq olunmasının mümkünsüzlüyü, lizinq sahəsində ixtisaslı mütəxəssislərin çatışmazlığı kimi problemlər də mənfi təsir göstərir».
Hesabatda həmçinin lizinq bazarını inkişaf etdirmək və qlobal böhranın şirkətlərə təsirini azaltmaq üçün qısa müddətdə idxal olunan lizinq obyektlərinə tətbiq edilən ƏDV-ni aradan qaldırmaq, lizinq obyektinin «surətli amortizasiya»sı mexanizminin tətbiqinə icazə vermək, Azərbaycan Dövlət Neft Fondunda və Azərbaycan Mərkəzi Bankında olan dövlət ehtiyatları, habelə digər daxili mənbələr, o cümlədən dövlət büdcəsinin ehtiyatlar maddəsi hesabına ölkədə fəaliyyət göstərən lizinq təşkilatlarına uzunmüddətli təyinatlı maliyyə vəsaitlərinin ayrılması mexanizmini yaratmaq, xərclərin səmərəliliyi üzərində nəzarət sistemini sərtləşdirmək, işçi heyətinin qeyri-iqtisadi motivasiyasını gücləndirmək, kredit və risk proseduralarına yenidən baxmaq, lizinq sifarişlərinin qiymətləndirilməsi və monitorinqini sərtləşdirmək, yeni unikal mikro pərakəndə lizinq məhsullarının yaradılması tədbirlərini gücləndirmək təklif olunur. Bununla yanaşı, hazırda lisenziyalaşdırılan fəaliyyət olmamasını, habelə dövlətin qeyri-neft sektorunun inkişafına diqqətinin artmasını, xüsusi ilə emal sənayesinin inkişafını stimullaşdıran tədbirlər görməyə başlamasını nəzərə alaraq, lizinq şirkəti yaratmaq və ya mövcud lizinq şirkəti almaq və ya ortağı olmaq, bankların digər səbəblərlə yanaşı, daşınmaz əmlakın girov kimi götürmələrindən ehtiyat edərək, kredit verməmələri, habelə bir çox hallarda girovun sənədləşməsinin uzun və xərcli olmasını nəzərə alaraq, lizinqdən istifadəyə üstünlük vermək kimi tövsiyələr əksini tapıb.