Maliyyə

Ana səhifə

Maliyyə

Azərbaycanın XÖHKS sistemində aparılan əməliyyatların sayı martda ilk dəfə 423 minə çatıb

01 may 2009 11:12 (UTC +04:00)

Bakı. Vüqar İsrafilov – APA-Economics. Azərbaycanda fəaliyyət göstərən kredit təşkilatlarının Xırda Ödənişlər üzrə Hesablaşma Klirinq Sistemində (XÖHKS) apardığı əməliyyatların həcmi 2009-cu ilin mart ayında 386 mln. manat təşkil edib. Bu barədə «APA-Economics»ə Azərbaycan Mərkəzi Bankının (AMB) Statistika Departamentindən məlumat verilib.

AMB-nin hesablamalarına əsasən, XÖHKS sistemində qeydə alınan banklararası ödəniş əməliyyatlarının həcmi fevral ayı ilə müqayisədə 39 mln. manat və ya 11,24% artıb. Nəticədə, bu ilin ilk rübündə əməliyyatların məcmu həcmi 1 267 mln. manat təşkil edərək, ötən ilin müvafiq dövrünün göstəricisini 428 mln. manat və ya 51,01% üstələyib. Tranzaksiya həcmlərinin artması ilə bərabər, ödəniş əməliyyatlarının sayı da çoxalıb. Belə ki, mart ayında XÖHKS-də qeydə alınan əməliyyatların sayı ilk dəfə 423 minə çatıb, cari ilin I rübü ərzində isə 1 267 minə bərabər olub. Ötən ilin yanvar-mart ayları ilə müqayisədə Xırda Ödənişlər üzrə Hesablaşma Klirinq Sistemində keçirilən tranzaksiyaların sayı 3,56 dəfə artıb.

Qeyd etmək lazımdır ki, banklararası ödəniş əməliyyatlarının sayca əksər hissəsi məhz XÖHKS-in payına düşür. Banklar tərəfindən aparılan xırda ödənişlərin payı klirinq əməliyyatlarının ölkə üzrə ümumi sayında 93,57%-ə bərabərdir. Buna baxmayaraq, Xırda Ödənişlər üzrə Hesablaşma Klirinq Sistemində qeydə alınan hər bir əməliyyatın orta məbləği isə son bir ildə 2 700 manatdan 900 manata enib.

Xatırladaq ki, 2002-ci ildə istifadəyə verilən XÖHKS sistemi müasir texnologiyalara əsaslanan xırda və təcili olmayan ödənişlər üçün klirinq şəbəkəsidir. Sistem Dünya Bankının himayəsi altında keçirilən tenderin qalibi olan «CMA Small Systems AB» şirkəti tərəfindən hazırlanıb. Sistemdə gün ərzində 300 minədək ödənişin qəbulu aparıla bilər. XÖHKS-də 46 kommersiya bankı ilə bərabər «Aqrarkredit» təşkilatı, İpoteka Fondu, Baş Dövlət Xəzinədarlığı və Vergilər Nazirliyi əməliyyat apara bilər.