Maliyyə

Ana səhifə

Maliyyə

Azərbaycan «Banklar haqqında» qanuna dəyişikliklər edəcək

05 may 2009 11:08 (UTC +04:00)

Bakı. Elnur Hüseynquluyev – APA-Economics. Azərbaycanın «Banklar haqqında» qanununa əlavə və dəyişikliklərin edilməsi məqsədilə mövcud qanun üzrə monitorinq aparılır. «APA-Economics»in məlumatına görə, bunu Milli Məclisin iqtisadi siyasət komitəsinin sədri Ziyad Səmədzadə bildirib.
Z.Səmədzadənin sözlərinə görə, hazırda komitə tərəfindən bir neçə qanunvericxilik sənədinin layihəsi araşdırılır ki, bunlar da Rəqabət Məcəlləsi, «Əmanətlərin sığortalanması haqqında» və s. qanunlardır.
«Banklar haqqında» qanuna gəldikdə isə, konkret olaraq bu qanun üzrə monitorinq aparılır və burada əsas məqsəd hazırda daha uğurla işləyən maddələri müəyyənləşdirməkdir. «Bu gün Azərbaycanda bir sıra bank mövcuddur ki, onlar hələ də öz yerini tutmayıb, lakin mən həmin bankların adlarını açıqlamaq istəmirəm. Artıq Azərbaycanın bank sektorunda aparılan islahatların nəticəsi göz qabağındadır. Dünyada baş verən maliyyə böhranı ilə bağlı xarici banklardan fərqli olaraq, Azərbaycanda fəaliyyət göstərən bank təşkilatları müflis olmayıb. Bu isə hökumət tərəfindən banklara ciddi nəzarətin olması, eyni zamanda Azərbaycan Mərkəzi Bankı tərəfindən uçot dərəcəsinin aşağı salınması ilə bağlıdır», - millət vəkili bildirib.
Z.Səmədzadə «Banklar haqqında» mövcud qanuna ediləcək əlavə və dəyişikliklərlə bağlı hazırlıq prosesinin bu ilin payız aylarında yekunlaşacağını qeyd edib.