Maliyyə

Ana səhifə

Maliyyə

«Kapital Bank» yeni prosessinq sisteminə miqrasiya edib

06 may 2009 15:09 (UTC +04:00)

Bakı. Elnur Hüseynquluyev – APA-Economics. Bu gün Azərbaycanın «Kapital Bank» Səhmdar Kommersiya Bankının (SKB) özünün prosessinq sisteminə keçməsi ilə bağlı bankın İdarə Heyətinin sədri Rauf Rzayev mətbuat konfransı keçirib.
«APA-Economics»in məlumatına görə, R.Rzayev banka məxsus plastik kartlarla dünən gün ərzində əməliyyatların aparılmasının mümkün olmadığını bildirib. Həmçinin, bankın respublika üzrə bankomatları, POS-terminalları və plastik kartları işləməyib.
Sədrin sözlərinə görə, yeni prossesinq sisteminə keçid zamanı bank heç bir maliyyə itkisi ilə üzləşməyib: «Hazırda bankın plastik kartları vasitəsi ilə xarici və daxili bank əməliyyatları aparmaq mümkündür. Sadəcə olaraq, bankomatlar sistemə tam qoşulmayıb. Hazırda bankın respublika üzrə 320 bankomatı fəaliyyət göstərir. Bu ATM-lərin 249-u yeni sistemə qoşulub və bunun 112-si yeni sistem üzrə artıq fəaliyyət göstərir».
R.Rzayev yeni prosessinq sisteminə digər kommersiya banklarının qoşulmasını bankların birbaşa öz istəyindən asılı olduğunu bildirib.
Qeyd edək ki, müvafiq xidmətlərin göstərilməsi ilə bağlı bankın ötən il elan etdiyi tenderdə Rusiyanın «Kompas» şirkəti qalib gəlib və yeni prosesinq sistemi həmin təşkilat tərəfindən qurulub.
Sistemin gücü 2,5 mln. kart, 550 bankomat, 5 min POS-terminal və 200 informasiya köşkünə xidmət göstərməyə imkan verir. Eyni zamanda, yeni sistem 1 saniyədə 60-dan çox kart üzrə əməliyyat aparmaq imkanına malikdir.
Xatırladaq ki, yeni prosessinq sisteminin tətbiqi ilə bağlı cari ilin may ayının 5-də «Azəricard» MMC-dən alınan məlumat əsasında «Kapital Bank»a məxsus plastik kartların və ekvayrinq şəbəkəsinin sözügedən sistemə miqrasiyası həyata keçirilib.
Qeyd edək ki, hazırda bankın 2 milyona yaxın plastik kart müştərisi (pensiya, kənd təsərrüfatı istehsalçılarına yardımlar, məcburi köçkünlərə verilən yemək xərcləri, əmək haqqı və s.) mövcuddur.
Xatırladaq ki, «Kapital Bank» SKB 2000-ci ildən fəaliyyət göstərir. Bankın səhmdarları rolunda «AtaHolding» (30%), «Paşa Holding» (30%), «Xalq Sığorta» (15%), «Azersun Holding» (10%), fiziki şəxslər (10%) və bankın əmək kollektivi (5%) çıxış edir.
Cari ilin aprel ayının 1-nə bankın aktivlərinin həcmi 341,534 mln. manat, depozit portfeli 174,914 mln. manat, kredit portfeli 168,059 mln. manat, məcmu kapitalı 76,754 mln. manat, o cümlədən nizamnamə kapitalı 24 mln. manat təşkil edib. Hazırda bankın respublika üzrə 88 filialı, 312 bankomatı və 480 POS-terminalı fəaliyyət göstərir.
.