Maliyyə

Ana səhifə

Maliyyə

«Azərdəmiryolbank» xidmət vaxtını uzadır

07 may 2009 15:06 (UTC +04:00)

Bakı. Vahab Rzayev – APA-Economics. «Azərdəmiryolbank» Səhmdar Kommersiya Bankı (SKB) müştərilərə kassa xidməti vaxtını uzatmaq barədə qərar qəbul edib. Bankdan «APA-Economics»ə verilən məlumata görə, əgər əvvəllər bank əməliyyat sifarişlərini 16:00-dək qəbul edirdisə, bundan sonra paytaxt filialları mədaxil əməliyyatlarını saat 18:00-dək, baş ofisdəki «Əməliyyat» filialı isə 20:00-dək həyata keçirəcək.
«Axşam kassası» zamanı müştərilərdən kommunal və digər xidmətlər üçün vəsaitlər qəbul ediləcək, pul köçürmələri və digər hesablaşmalar həyata keçiriləcək, depozit hesabları açmaq mümkün olacaq. Bankın marketinq departamentində vurğulayıblar ki, yenilik bankın müştəri bazasını genişləndirməyə imkan verəcək və səhər və gündüz saatlarında imkanları olmayanlara əlverişli olacaq.
Ümumilikdə, «Azərdəmiryolbank»ın filial şəbəkəsi 32 ofisdən ibarətdir. Bakıda 14 filial və şöbəsi var. Paytaxt bölmələri şənbə günləri də işləyir.
Xatırladaq ki, «Azərdəmiryolbank»ın aktivlərinin həcmi 2009-cu ilin aprel ayının 1-nə 209,32 mln. manat, kredit portfeli 160,35 mln. manat, məcmu öhdəlikləri 169,7 mln. manat, bankın fiziki və hüquqi şəxslərin depozitlərinin həcmi 54,85 mln. manat, o cümlədən müddətli depozitlər 43,5 mln. manat təşkil edib. Bankın məcmu kapitalı 39,62 mln. manata bərabərdir.
Qeyd edək ki, 1989-cu ildə təsis edilən «Azərdəmiryolbank» SKB-nin nizamnamə kapitalında «25%+1 səhm» iştirak payı Avropa Yenidənqurma və İnkişaf Bankı (EBRD), 10%-i Hollandiyanın Maliyyə İnkişaf Şirkətinə (FMO), 10%-i hüquqi şəxslərə, qalanı isə fiziki şəxslərə məxsusdur.