Maliyyə

Ana səhifə

Maliyyə

Azərbaycanda verilmiş bank kreditlərinin 64%-i qısamüddətlidir

08 may 2009 12:47 (UTC +04:00)

Bakı. Vahab Rzayev – APA-Economics. Azərbaycanda fəaliyyət göstərən kommersiya bankları və qeyri-bank kredit təşkilatları tərəfindən 2009-cu ilin yanvar-mart ayları ərzində yeni verilmiş kreditlərin həcmi 1 658,2 mln. manat təşkil edib ki, bu da ötən ilin eyni dövrü ilə müqayisədə 232 mln. manat və ya 12,3% azdır.

Azərbaycan Mərkəzi Bankından «APA-Economics»ə verilən məlumata əsasən, yeni verilmiş kreditlərin strukturunda uzunmüddətli kreditlərin xüsusi çəkisi 36,5% təşkil edib. Yeni verilmiş uzunmüddətli kreditlərin həcmi isə 2009-cu ilin yanvar-mart aylarında ötən ilin müvafiq dövrü ilə müqayisədə 45,1% azalıb:

(mln. manat)

Yeni kreditlərin həcmi	2009-cu ilin I rübü	2008-ci ilin I rübü
Qısamüddətli	1 053,7	789,1
1 ayadək	60,7	120,9
1 aydan 3 aya qədər	81,3	111,5
3 aydan 6 aya qədər	143,9	145,7
6 aydan 9 aya qədər	206,7	104
9 aydan 1 ilə qədər	561,1	307
Uzunmüddətli	604,5	1 101,1
1 ildən 3 ilə qədər	494,5	95,7
3 ildən 5 ilə qədər	87,2	98,1
5 ildən 10 ilə qədər	21,8	34,7
10 ildən yuxarı	1	16,6
Cəmi	1 658,2	1 890,2

Göründüyü kimi, əsas azalma 1 ildən 3 ilə qədər müddətə verilən kreditlər üzrə müşahidə olunur ki, bu azalma 5,2 dəfə təşkil edib. Eyni zamanda, 6-9 aylıq və 9-12 aylıq kreditlər üzrə nəzərə çarpan dərəcədə artım baş verib.

AMB-nin məlumatına görə, təhlil olunan dövrdə qısamüddətli kredit qoyuluşlarının 94,5%-ni banklar tərəfindən verilən kreditlər, 5,5%-ni isə qeyri-bank kredit təşkilatlarının ssudaları təşkil edib. O cümlədən, bank sisteminin qısamüddətli kredit qoyuluşunda Beynəlxalq Bankın payı 33%, digər bankların payı isə 67% olub. Uzunmüddətli kredit qoyuluşunun 98,3%-ni bank kreditləri, 1,7%-ni isə qeyri-bank kredit təşkilatlarının kreditləri təşkil edib. Bank sisteminin uzunmüddətli kredit qoyuluşunda Beynəlxalq Bankın payı 42,4%-ə, digər bankların payı isə 57,6%-ə bərabər olub.

Qeyd edək ki, ümumilikdə, cari ilin aprelin 1-nə kredit qoyuluşlarının həcmi 6 221,3 mln. manat təşkil edib ki, bu da ötən ilin müvafiq dövrü ilə müqayisədə 1 276,2 mln. manat və ya 25,8% çoxdur. Kredit qoyuluşlarının 33,3%-i qısamüddətli kreditlərin payına düşür:

(mln. manat)

	01.04.2009	01.01.2008
Qısamüddətli kreditlər	2 070,2	1 725
Uzunmüddətli kreditlər	4 151,1	3 220,1
Kredit qoyuluşları, cəmi	6 221,3	4 945,1

Göründüyü kimi, uzunmüddətli və qısamüddətli kreditlərin ümumi həcmdə nisbətləri yeni verilmiş kreditlər və cəmi kredit portfeli üzrə fərqlənir. Bu da son zamanlar banklar tərəfindən uzunmüddətli kreditlərin verilməsini məhdudlaşdırılması və kreditlərin əsas hissəsinin qısamüddətli kreditləşməyə yönəldilməsinin nəticəsidir.