Maliyyə

Ana səhifə

Maliyyə

«Bank of Azerbaijan» yeni aksiya keçirir

12 may 2009 09:34 (UTC +04:00)

Bakı. Elnur Hüseynquluyev – APA-Economics. «Bank of Azerbaijan» Səhmdar Kommersiya Bankı (SKB) bu günlərdə MAY (Manat Al və Yerləşdir) adlı yeni aksiyaya başlayıb. May ayının sonunadək davam edəcək aksiyanın əsas mahiyyəti əhali üçün ABŞ dollarını milli valyutaya (manata) ən yüksək məzənnə ilə konvertasiya olunması üçün şərait yaratmaqdır.
Bu barədə «APA-Economics»ə «Bank of Azerbaijan»ın Bakıdakı baş ofisindən məlumat verilib: «Əhali bankımızın istənilən filialında məhdudiyyətsiz həcmdə və ən yüksək məzənnə ilə dollar sata bilər. Lakin bu hələ son deyil. Biz nəinki dollar alırıq, hətta əhalinin manat ehtiyatlarının artırılması üçün şərait yaradırıq».
Belə ki, dolları manata çevirən müştərilər milli valyutada olan həmin vəsaitləri «Bank of Azerbaijan»da hesaba qoya bilər. Depozitin müddəti ən azı 6 ay olmalıdır. «Maraqlıdır ki, 6 aydan sonra faiz artımına görə əmanətin məbləği illik olaraq 15% artacaq. Əgər əmanətçi vəsaitlərini bir il müddətinə bankda yerləşdirərsə, bu halda faiz dərəcəsi 17%, iki ilə - 18%, üç ilə isə – 19% təşkil edəcək. Lakin biz bununla da kifayətlənmirik. «Bank of Azerbaijan» ölkədə hər ay bu cür yüksək faiz dərəcələri ödəyən yeganə bankdır», - deyə bankdan bildirilib.
Xatırladaq ki, təsisçisi «NEM Holding» və 2 fiziki şəxs olan «Bank of Azerbaijan» SKB 1993-cü ildən fəaliyyət göstərir. Cari ilin yanvar ayının 1-nə bankın aktivlərinin həcmi 108,756 mln. manat, kredit portfeli 88,431 mln. manat, depozit portfeli 42,490 mln. manat, məcmu kapitalı 19,914 mln. manat, o cümlədən nizamnamə kapitalı 14,635 mln. manat təşkil edib.