Maliyyə

Ana səhifə

Maliyyə

Varşavada Polşa-Azərbaycan iqtisadi əməkdaşlıq üzrə hökumətlərarası komissiyanın iclası keçirilir

12 may 2009 12:34 (UTC +04:00)

Bakı. Rəşad Süleymanov – APA-Economics. Bu gün Varşava şəhərində Polşa-Azərbaycan iqtisadi əməkdaşlıq üzrə hökumətlərarası komissiyanın növbəti iclası işə başlayıb. Bu barədə «APA-Economics»ə Azərbaycan Sənaye və Energetika Nazirliyindən məlumat verilib.

Bu gün komissiyanın iclasına hazırlıq olaraq ekspertlər səviyyəsində müzakirələr aparılıb. Ekspert qrupuna Azərbaycan tərəfindən Sənaye və Energetika Nazirliyi, İqtisadi İnkişaf Nazirliyi və Dövlət Neft Şirkətinin əməkdaşları daxildir.

Mayın 15-dək davam edəcək komissiyanın iclasının gündəliyində ikitərəfli iqtisadi əməkdaşlıq, o cümlədən enerji təhlükəsizliyi, sənaye, kənd təsərrüfatı, turizm, nəqliyyat, maliyyə-bank sahələrində əlaqələrə dair geniş fikir mübadiləsinin aparılması nəzərdə tutulub. İclasın sonunda hökumətlərarası komissiyanın iclasının yekunlarına dair protokol imzalanacaq.

Qeyd edək ki, Polşa-Azərbaycan iqtisadi əməkdaşlıq üzrə hökumətlərarası komissiyanın Azərbaycan tərəfindən həmsədri sənaye və energetika naziri Natiq Əliyevdir. N.Əliyevin başçılıq etdiyi nümayəndə heyətinin Polşanın rəsmi şəxsləri ilə bir sıra görüşlərinin keçirilməsi də nəzərdə tutulub.