Maliyyə

Ana səhifə

Maliyyə

Vaqif Əkbərov: «Tezliklə «Joint Leasing»in yenidən Azərbaycanın lizinq bazarında liderliyə yüksələcəyinə əminəm»

12 may 2009 13:02 (UTC +04:00)

Bakı – APA-Economics. «Joint Leasing» Azərbaycan-Britaniya şirkətinin təsisçilər tərəfindən maliyyələşdirilməsi artıq bu il ərzində bərpa oluna bilər. Bu barədə «APA-Economics»ə şirkətin Azərbaycan tərəfindən həmtəsisçisi olan Beynəlxalq Bankın (ABB) İdarə Heyətinin sədr müavini Vaqif Əkbərov bildirib.

V.Əkbərovun fikrincə, hazırkı şəraitdə dünya miqyasında əksər şirkət və təşkilatlarda müşahidə olunan vəsait çatışmazlığı qlobal maliyyə böhranı ilə bağlıdır, lakin bu çətinliyin tezliklə aradan qalxacağı gözlənilir.

«Lizinq bazarı bizim bank üçün əsas prioritetlərdən biridir və «Joint Leasing» şirkətinə lazımi səviyyədə maliyyə dəstəyi göstəriləcək. Bununla yanaşı, şirkət özü də ötən ili olduqca müsbət göstəricilərlə başa vurub. İstənilən halda artıq tezliklə «Joint Leasing»in yenidən Azərbaycanın lizinq bazarında liderliyə yüksələcəyinə əminəm», - deyə V.Əkbərov vurğulayıb.

Qeyri-rəsmi məlumatlara görə, cari ilin əvvəlindən «Joint Leasing» şirkətinin əsas maliyyə göstəriciləri üzrə mənfi dinamika müşahidə olunur.

Xatırladaq ki, «Joint Leasing» QSC 14 iyun 2007-ci il tarixindən «AzeriLeasing» şirkətinin hüquqi varisi kimi fəaliyyət göstərir. Şirkətin təsisçiləri rolunda ABB (47,6%) və Böyük Britaniyanın «Dolphin Leasing» (52,4%) şirkəti çıxış edir. «Joint Leasing» şirkətinin sələfi, Azərbaycanın ilk lizinq şirkəti olan «AzeriLeasing» isə 1999-cu ildə yaradılıb.

Cari ilin yanvar ayının 1-nə şirkətin lizinq portfelinin həcmi 55,587 mln. manat, lizinq müqavilələrinin sayı 384, investisiyaların həcmi 21,974 mln. manat və nizamnamə kapitalı isə 700 min manat təşkil edib.

Bu yaxınlarda «Joint Leasing»in baş ofisi yeni ünvana köçüb. Yeni baş ofis Bakı şəhərinin Zərifə Əliyeva pr-ti,55 («Yeni Həyat» Biznes Mərkəzi) ünvanında yerləşir. Bundan öncə isə şirkət Fizuli küçəsi,65 ünvanında fəaliyyət göstərib.