Maliyyə

Ana səhifə

Maliyyə

«Əmrahbank» SKB «T24 Model Bank» proqram təminatını əldə edib

13 may 2009 10:32 (UTC +04:00)

Bakı. Elnur Hüseynquluyev – APA-Economics. Azərbaycanın «Əmrahbank» Səhmdar Kommersiya Bankı (SKB) müştərilərə təqdim etdiyi xidmətlərin keyfiyyətini yüksəltmək, həmçinin şəbəkə sisteminin fəaliyyətinə köməklik məqsədi ilə İsveçin «Temenos» şirkətinin «T24 (T24) Model Bank» proqram təminatını tətbiq edib.

Bankın baş ofisindən «APA-Economics»ə verilən məlumata görə, sistemin bankda tətbiqinin əsas məqsədi müştərilərə göstərilən xidmət və fəaliyyətin səviyyəsini yüksəltmək, effektivliyini artırmaq, bank işində istifadə olunacaq müasir, fundamental və geniş funksional imkanları daha da artırmaqdır.

Bankdan bildirilib ki, bu layihənin ikinci mərhələsində bank fəaliyyəti ilə bağlı mövcud qanunvericilikdə müvafiq əlavə və dəyişikliklər edildikdən sonra «Əmrahbank» fəaliyyətini tam olaraq şəriət qaydalarına uyğunlaşdırmaq məqsədi ilə «T24»-ün İslam Bankçılığı modulunu da əldə etmək niyyətindədir.

Bu isə «Əmrahbank»a gələcəkdə Azərbaycanda və qonşu ölkələrdə İslam bankçılığının təmin edə biləcək imkanlardan istifadə etməyi, həmçinin Azərbaycanla Yaxın Şərq ölkələri arasındakı münasibətlərin daha da genişləndirilməsi və inkişaf etdirilməsinə şərait yaradacaq.

Xatırladaq ki, təsisçisi 5 yerli fiziki şəxs olan «Əmrahbank» ASC 1993-cü ildən fəaliyyət göstərir. Hazırda bankın respublika üzrə 22 filialı, 12 bankomatı və 45 POS-terminalı var. Cari ilin aprel ayının 1-nə banklın aktivlərinin həcmi 61,442 mln. manat, depozit portfeli 31,142 mln. manat, kredit portfeli 39,552 mln. manat, məcmu kapitalı 22,552 mln. manat, o cümlədən nizamnamə kapitalı 12,821 mln. manat olub.

Qeyd edək ki, «Temenos Group» 1993-cü ildə təsis edilib və hazırda şirkətin səhmləri İsveçrə Fond Birjasında dövriyyədədir. Şirkət dünya miqyasında pərakəndə və korporativ müştərilər, ümumi bank işi, özəl vəsaitlərin idarə olunması, İslam bankçılığı, mikro-maliyyələşdirmə və regional bankçılıq sahələrini əhatə etməklə proqram təminatı məhsullarını təqdim edir. Baş ofisi Cenevrədə yerləşən və dünyanın müxtəlif yerlərində 44 idarəsi olan bu şirkət 120-dən çox ölkədə 600-dən çox müştəriyə xidmətlər təklif edir.