Maliyyə

Ana səhifə

Maliyyə

«Azərbaycan Sənaye Bankı» son bir ildə mənfəətini 69% artırıb

13 may 2009 12:00 (UTC +04:00)

Bakı. Elnur Hüseynquluyev - APA-Economics. «Azərbaycan Sənaye Bankı» Açıq Səhmdar Cəmiyyətinin (ASC) aktivlərinin həcmi 2009-cu ilin aprel ayının 1-nə 61,373 mln. manat təşkil edib ki, bu da ötən ilin aprelin 1-nə olan analoji göstəricidən 29% azdır.
Bankın mətbuat xidmətinin rəhbəri Fərid Məmmədovun «APA-Economics»ə verdiyi məlumata görə, hesabat dövründə bankın depozit portfeli 61,5% azalaraq 22,272 mln. manat, kredit portfeli 37,8% azalaraq 35,134 mln. manat, o cümlədən istehlak kreditlərinin həcmi 2 dəfə artaraq 9,636 mln. manat olub.
Həmçinin, bankın məcmu kapitalı 15% artaraq 17,082 mln. manat, o cümlədən nizamnamə kapitalı sabit qalaraq 12,8 mln. manat təşkil edib.
Qeyd edək ki, son bir ildə bankın gəlirləri 28% azalaraq 2,693 mln. manat, xərcləri isə 44,3% azalaraq 1,765 mln. manata çatıb. Nəticədə, bankın mənfəəti 68,7% artaraq 0,928 mln. manata çatıb.
Xatırladaq ki, bu müddət ərzində bankın PR və marketinq xərcləri 3,6 dəfə artaraq 47 min manat, ölkə iqtisadiyyatına yatırılan sərmayələrin həcmi isə sabit qalaraq 2,806 mln. manat olub.
Bundan başqa, son bir ildə bank tərəfindən əlavə 3 filial açılıb, 9 bankomat və 148 POS-terminal quraşdırılıb. Həmçinin, bankın işçilərinin sayı 70% artaraq 129 nəfərə çatıb.
«Azərbaycan Sənaye Bankı» 1996-cı ildə «CI Bank» ASC kimi fəaliyyətə başlayıb və 2006-cı ilin sonunda brendini dəyişib. Hazırda bankın respublika üzrə 7 filialı, 21 bankomatı və 199 POS-terminalı fəaliyyət göstərir.