Maliyyə

Ana səhifə

Maliyyə

Azərbaycan Mərkəzi Bankının xarici aktivləri azalır

15 may 2009 08:18 (UTC +04:00)

Bakı. Vahab Rzayev – APA-Economics. Azərbaycan Mərkəzi Bankının (AMB) məcmu beynəlxalq (xarici) aktivlərinin həcmi 2009-cu ilin mayın 1-nə 4 165,6 mln. manat təşkil edib. AMB-dən «APA-Economics»ə verilən məlumata əsasən, bu göstərici ötən ilin mayın əvvəli ilə müqayisədə 476,2 mln. manat və ya 10,3% azalıb. Cari ilin əvvəlindən isə Mərkəzi Bankın məcmu xarici aktivlərinin həcmi 1 014,6 mln. manat və ya 19,6% azalıb. Azalmanın aylıq dinamikasına diqqət yetirsək, məlum olacaq ki, yanvarda bu göstərici 45,6 mln. manat, fevralda 323,3 mln. manat, martda 621 mln. manat, apreldə isə 24,7 mln. manat təşkil edib.

Qeyd edək ki, AMB-nin məcmu xarici aktivləri son illər ərzində artım dinamikası nümayiş etdirib, lakin son aylarda azalma baş verir. Məsələn, 2006-cı ildə bu göstəricinin artımı 1 097 mln. manat və ya 2 dəfə, 2007-ci ildə 1 433,2 mln. manat və ya 66%, 2008-ci ildə isə 1 568,2 mln. manat və ya 43% təşkil edib. Vurğulamaq lazımdır ki, ötən il də aylıq azalmalar müşahidə olunub, lakin bu tendensiya xarakteri daşımayıb. İndi isə ardıcıl 4 ay Mərkəzi Bankın məcmu xarici aktivləri azalır.

Bunun əsas səbəbləri kimi dünya maliyyə böhranı nəticəsində Azərbaycan bank sistemində, məzənnə siyasəti sahəsində yaranmış mənfi tendensiyaların aradan qaldırılmasını qeyd etmək olar. Belə ki, bank sistemində xarici öhdəliklərin yerinə yetirilməsi məcburiyyətinə görə bir sıra bankda yaranmış likvidlik problemlərinin həlli üçün Mərkəzi Bank mərkəzləşdirilmiş kredit bazarında fəallığını artırıb. Məsələn, cari ilin aprelin 1-nə yenidənmaliyyələşdirmə portfelinin həcmi 250 mln. manata çatıb ki, bu da ötən ilin müvafiq dövrü ilə müqayisədə 2,6 dəfə çoxdur. Məzənnə siyasətinə gəldikdə isə Azərbaycanda digər inkişafda olan ölkələr kimi milli valyutanın dollara qarşı ucuzlaşması ehtimalları yarana bilərdi, lakin Mərkəzi Bankın valyuta bazarına müdaxiləsi nəticəsində bu, baş verməyib. Nəticədə, ilin əvvəlindən Rusiya, Qazaxıstan, Ermənistan, Ukrayna kimi ölkələrdə milli valyutanın 20-30% səviyyəsində devalvasiyası fonunda Azərbaycanda manat dollara qarşı son 4,5 ay ərzində cəmi 0,26% ucuzlaşıb.