Maliyyə

Ana səhifə

Maliyyə

«Paşa Sığorta» şirkəti daha bir bankın işçilərinin tibbi sığortaçısı olub

15 may 2009 10:18 (UTC +04:00)

Bakı. Elnur Hüseynquluyev – APA-Economics. Azərbaycanın «Paşa Sığorta» şirkəti «Bank Avrasiya» SKB-nin işçilərinin tibbi sığortası üzrə korporativ müsabiqənin qalibi elan olub.

Şirkətdən «APA-Economics»ə verilən məlumata görə, tibbi sığorta müqaviləsi «Bank Avrasiya» ASC-nin İdarə Heyətinin sədr müavini Arif İsmayılov və «Paşa Sığorta» şirkətinin İdarə Heyətinin sədr müavini Fuad Nəcəfli tərəfindən imzalanıb.

Bağlanmış tibbi sığorta müqaviləsi bank və inzibati heyət daxil olmaqla, bankın Bakı və ölkənin digər bölgələrində yerləşən filiallarının heyətini əhatə edir.

Qeyd edək ki, bununla da «Paşa Sığorta» şirkətinin «Tibbi sığorta» növü üzrə sığortaladığı bankların sayı 5-ə çatıb. Bundan öncə analoji müqavilələr «Bank Respublika», «Azərdemiryolbank», «Bank of Baku» və «Paşa Bank» SKB ilə imzalanıb.

«Paşa Holding» Şirkətlər Qrupuna daxil olan «Paşa Sığorta» şirkəti 2006-cı ildən fəaliyyət göstərir. Şirkətin 2008-ci il ərzində topladığı sığorta haqlarının həcmi 8,44 mln. manat, ödənişlər isə 0,94 mln. manat olub. Cari ilin yanvar ayının 1-nə şirkətin nizamnamə kapitalı 9 mln. manat təşkil edib. Hazırda şirkət 4 icbari və 25 könüllü sığorta növü üzrə xidmət göstərir.

Xatırladaq ki, «Bank Avrasiya» ASC-yə lisenziya 2007-ci ilin noyabr ayında verilib. Cari ilin yanvar ayının 1-nə bankın aktivlərinin həcmi 45,171 mln. manat, depozit portfeli 20,857 mln. manat, kredit portfeli 27,074 mln. manat, məcmu kapitalı 20,434 mln. manat, o cümlədən nizamnamə kapitalı 20 mln. manat təşkil edib. Bu ilin yanvar ayının 1-nə bankın işçilərinin sayı 41 nəfər olub.