Maliyyə

Ana səhifə

Maliyyə

Azərbaycanda ehtiyat pulların azalması davam edir

18 may 2009 10:31 (UTC +04:00)

Bakı. Vahab Rzayev – APA-Economics. Azərbaycanda ehtiyat pulların həcmi 2009-cu ilin may ayının 1-nə 3 679,6 mln. manat təşkil edib. Azərbaycan Mərkəzi Bankından «APA-Economics»ə verilən məlumata görə, bu göstərici son bir ildə 388,4 mln. manat və ya 11,8% artıb.

Lakin cari ilin əvvəlindən ehtiyat pulların azalması müşahidə olunur. Belə ki, son dörd ay ərzində ehtiyat pulların həcmi 1 101,7 mln. manat və ya 23% azalıb. O cümlədən, yanvarda azalma 481,1 mln. manat, fevralda 172,4 mln. manat, martda 425,7 mln. manat, apreldə isə 22,5 mln. manat təşkil edib. Göründüyü kimi, aprel ayında ehtiyat pulların azalma tempinin səngiməsi müşahidə olunub. Bu, tək ehtiyat pulların dinamikasında deyil, digər pul-kredit göstəriciləri üzrə müşahidə olunur. Belə ki, Mərkəzi Bankın xarici aktivləri son dörd ayda 1 014,6 mln. manat azaldığı halda, apreldə azalma cəmi 24,7 mln. manat təşkil edib.

Eyni zamanda, Mərkəzi Bankın kommersiya banklarına olan tələblərinin həcmi son bir ildə 254,6 mln. manat və ya 3,6 dəfə, cari ilin əvvəlindən 120 mln. manat və ya 51%, apreldə 97 mln. manat və ya 37,8% artaraq mayın 1-nə 353,5 mln. manata bərabər olub. Həmin göstəricilər maliyyə sistemində, o cümlədən bank sistemi vasitəsi ilə cari ildə maliyyə vəsaitlərinin mərkəzdən periferiyaya, yəni Mərkəzi Bankdan kommersiya banklarına və digər istiqamətlərə axını haqqında xəbər verir. Bunun da əsas səbəbləri kimi maliyyə böhranının nəticələri və bu nəticələrin aradan qaldırılması üzrə görülən tədbirlər qeyd oluna bilər.