Maliyyə

Ana səhifə

Maliyyə

Azərbaycanda əhalinin aylıq pul gəlirləri dəyişməz qalıb

19 may 2009 11:03 (UTC +04:00)

Bakı. Vahab Rzayev – APA-Economics. Azərbaycanda əhalinin adambaşına düşən pul gəlirlərin həcmi 2009-cu ilin yanvar-aprel ayları üzrə 781,2 manat təşkil edib. Dövlət Statistika Komitəsindən «APA-Economics»ə verilən məlumata görə, bu göstərici ötən ilin müvafiq dövrü ilə müqayisədə 18,9% çoxdur.

Burada bir neçə amil qeyd olunmalıdır. İlk növbədə, adambaşına düşən pul gəlirlərinin artım tempinin kəskin azalması müşahidə olunur. Belə ki, 2008-ci ilin yanvar-aprel aylarında əvvəlki ilin müvafiq dövrü ilə müqayisədə bu göstəricinin artımı 32%-ə bərabər olub.

Bundan əlavə, son zamanlar Azərbaycanda adambaşına düşən pul gəlirlərinin aylıq həcmi dəyişməz qalır. Belə ki, ümumilikdə 2008-ci ildə adambaşına düşən pul gəlirlərinin həcmi 2 343,2 manat təşkil edib və bunun orta aylıq göstəricisi 195,3 manata bərabər olub. Cari ilin ilk dörd ayı ərzində ölkənin hər bir nəfərinin qazandığı gəlirin orta aylıq məbləği 195,3 manat təşkil edib. Eyni zamanda, ötən ilin yanvar-aprel aylarında orta aylıq rəqəm 164,3 manata bərabər olub ki, adambaşına düşən pul gəlirlərinin həcmi ilin qalan aylarında artıb və 31 manatlıq fərq aradan qalxıb.

Daha bir məqama diqqət yetirmək vacibdir. Ötən ilin yekunlarına görə, əhalinin ümumi pul gəlirləri 20 058,2 mln. manat, adambaşına göstərici isə 2 343,2 manat təşkil edib. Yəni, həmin hesablamada ölkənin əhalisi 8 560 174 nəfər kimi götürülüb. Cari ilin ilk dörd ayının yekunlarına görə, əhalinin ümumi pul gəlirləri 6 738 mln. manat, adambaşına göstərici isə 781,2 manat təşkil edib. Yəni, adambaşına pul gəlirlərinin hesablanmasında iştirak edən əhalinin say göstəricisi 8 625 192 nəfər kimi götürülüb. Beləliklə, əhalinin artımı dörd ay ərzində cəmi 0,76% təşkil edib. Nəticədə, aydın olur ki, əhalinin sayı təxminən dəyişməyib. Beləliklə, ötən il gəlirlərin orta aylıq göstəricisi cari ilin ilk dörd ayı üzrə orta aylıq göstəriciyə bərabər olub və ya sabit qalıb.