Maliyyə

Ana səhifə

Maliyyə

«Azərdəmiryolbank» və «Embawood» şirkəti ilə birgə kampaniyaya başlayıb

19 may 2009 13:00 (UTC +04:00)

Bakı. Elnur Hüseynquluyev – APA-Economics. Azərbaycanın «Azərdəmiryolbank» Səhmdar Kommersiya Bankı (SKB) məişət və ofis mebeli istehsalçısı olan «Embawood» şirkəti ilə birgə yeni kredit kampaniyasına başlayıb.

Bankın baş ofisindən «APA-Economics»ə verilən məlumata görə, «Embawood» şirkəti ilə imzalanmış müqaviləyə əsasən, hər bir müştəri mebelin alınması üçün minimum 300 manat, maksimum 3 min manat dəyərində 18 ayadək illik 25% dərəcəsi ilə kredit ala bilər.

İlk olaraq layihəyə Bakı filiallarında (Biləcəri, Nərimanov, Nizami, Xətai) start verilib. Növbəti mərhələdə bankın regionlarda yerləşən filialları (Masallı, Bərdə, Qazax, Şəki, Ağdaş və Gəncə) bu layihəyə qoşulub.

Bankın İdarə Heyətinin sədr müavini Yusif Cabbarovun sözlərinə görə, yaxın vaxtlarda bankın Korporativ müştərilərlə iş Departamenti korporativ müştərilər üçün yeni məhsul və xidmətlər hazırlayaraq bazara təqdim etməyi planlaşdırır: «Bu gün bank bu və ya digər layihələrin reallaşması istiqamətində ölkənin aparıcı şirkətləri ilə əməkdaşlığa böyük önəm verir».

Qeyd edək ki, kreditin alınması üçün yalnız iş yerindən arayış tələb olunur.

Xatırladaq ki, «Azərdəmiryolbank» SKB-nin 850-yə yaxın səhmdarı var. Nizamnamə kapitalında «25%+1 səhm» paketi Avropa Yenidənqurma və İnkişaf Bankına (EBRD), 10% Hollandiyanın Maliyyə İnkişaf Şirkətinə (FMO), 10% hüquqi şəxslərə, qalanı isə fiziki şəxslərə məxsusdur. «Azərdəmiryolbank» SKB 1989-cu ildə təsis edilib və hazırda bankın respublika üzrə 28 filialı fəaliyyət göstərir.

Cari ilin yanvar ayının 1-nə bankın aktivlərinin həcmi 224,698 mln. manat, kredit portfeli 168,592 mln. manat, depozit portfeli 49,497 mln. manat, məcmu kapitalı 37,398 mln. manat, o cümlədən nizamnamə kapitalı 13,40 mln. manat təşkil edib.