Maliyyə

Ana səhifə

Maliyyə

Dünya Bankı Azərbaycana yeni kredit ayırıb

20 may 2009 09:17 (UTC +04:00)

Azərbaycan İqtisadi İnkişaf Nazirliyindən «APA-Economics»ə verilən məlumata görə, bu gün layihə üzrə Azərbaycan hökuməti və DB arasında müvafiq kredit sazişi imzalanıb. Sənədi Azərbaycanın iqtisadi inkişaf naziri Şahin Mustafayev və DB-nın Azərbaycan üzrə ölkə meneceri Qreqori Yedjeyçak imzalayıblar. Beş il müddətində nəzərdə tutulmuş layihənin ümumi dəyəri 41,5 mln. dollar təşkil edir ki, bunun da 29,5 mln. dollarını DB, qalan hissəsini isə Azərbaycan hökuməti ayıracaq.

Layihədə nəzərdə tutulmuş tədbirlər 5 komponent üzrə həyata keçiriləcək. Belə ki, layihənin institusional islahat, potensialın artırılması və layihənin idarə olunması komponentinə əsasən, strateji planlaşdırmanın tamamlanmasına və «Təmiz Şəhər» ASC-nin qurulmasına, fəaliyyətinə və inkişafına dəstək veriləcək. Bu sahədə beynəlxalq təcrübəyə malik olan ən azı bir xarici mütəxəssis daimi olaraq «Təmiz Şəhər» ASC-də çalışacaq. Bundan başqa, müxtəlif spesifik məsələlər üzrə mütəxəssislərin cəlb edilməsi nəzərdə tutulur.

Layihənin Balaxanı poliqonunun təkmilləşdirilməsi və idarə edilməsi komponenti çərçivəsində bərk məişət tullantılarının idarə edilməsi üzrə ətraf mühitə göstərilən təsirə nəzarət edilməsi, mövcud poliqonun səmərəliliyinin artırılması və müasir standartlara uyğun avadanlıq və texnikanın alınması (körpü tərəziləri, buldozerlər və s.), tikinti işləri (hasarlama, tullantıların basdırılması, daxili yolların çəkilməsi və s.) maliyyələşdiriləcək. Balaxanı poliqonunun fəaliyyətinin təkmilləşdirilməsi ilə yanaşı, onun gələcəkdə bağlanmasına hazırlıq işləri də görüləcək. Bununla bərabər, yeni müasir poliqonların tikintisi üçün hazırlıq işləri də həyata keçiriləcək.

Layihənin digər poliqonların bağlanması və idarə edilməsi komponenti üzrə Bakı şəhəri ərazisindəki qeyri-rəsmi zibilliklərin bağlanması və təmizlənməsi, digər poliqonların idarə edilməsinin təkmilləşdirilməsi (və ya bağlanması) maliyyələşdiriləcək.

Qeyd edək ki, ötən ilin dekabrında İqtisadi İnkişaf Nazirliyi və Fransanın «CNİM S.A.» şirkəti arasında Bakı şəhərində bərk məişət tullantılarının yandırılması zavodunun layihələndirilməsi, inşası və istismarı üzrə müqavilə imzalanıb. Məişət tullantılarının yerləşdirilməsi, zərərsizləşdirilməsi və utilizasiyası yeni yaradılan «Təmiz Şəhər» ASC-yə həvalə olunub.

Xatırladaq ki, «Bərk məişət tullantılarının kompleks idarəçiliyi Layihəsi» DB ilə Azərbaycan hökumətinin birgə həyata keçirdiyi Abşeronun Ekoloji Bərpası Proqramı çərçivəsində həyata keçirilir.