Maliyyə

Ana səhifə

Maliyyə

«Fitch Ratings» agentliyi: Azərbaycan bank sisteminin hazırkı vəziyyəti sabitdir

21 may 2009 14:27 (UTC +04:00)

Bakı. Vahab Rzayev, Elnur Hüseynquluyev – APA-Economics. «Fitch Ratings» beynəlxalq reytinq agentliyi tərəfindən Azərbaycan bank sisteminin hazırkı vəziyyəti sabit kimi qiymətləndirilir. «APA-Economics»in məlumatına görə, bu barədə agentliyin MDB üzrə direktoru Vladimir Markelov bildirərək qeyd edib ki, eyni zamanda vaxtı keçmiş kreditlərlə vəziyyət buna mənfi təsir edə bilər.

V.Markelovun fikrincə, Azərbaycan bank sistemi üçün ən böyük təhlükə vaxtı keçmiş kreditlərdir, çünki onların həcmi artır və bu proses davam edəcək. «Azərbaycan bankları digər ölkələrlə müqayisədə, xüsusən də Ukrayna və Qazaxıstana nisbətən daha az xaricdən maliyyələşmə cəlb edib və buna görə həmin ölkələrin bank sistemində yaranan problemlər Azərbaycandan yan keçib», – deyə V.Markelov vurğulayıb.

Ümumilikdə, bank sistemində yaranmış pozitiv amillər kimi risk-menecmentin mövcud olması, kredit risklərinin qiymətləndirilməsi sisteminin mövcudluğu, mütəxəssislərin kifayət qədər yüksək səviyyəli olmasını qeyd edərək V.Markelov negativ amillər sırasında son üç ildə müşahidə olunan illik təxminən 60%-lik artımı qeyd edib. Çünki bu dinamika sonda istər-istəməz problemlərlə müşayiət olunmalıdır. Bundan başqa, «Fitch Ratings» rəsmisi digər problem kimi bank sektorunda şəffaflığın aşağı səviyyədə və banklarda korporativ idarəetmə sisteminin zəif olmasını vurğulayıb. Lakin eyni zamanda V.Markelov qeyd edib ki, bu problemlər bütün MDB ölkələrində müşahidə olunur.

V.Markelovun sözlərinə görə, agentlik tərəfindən yaxın bir ay ərzində Azərbaycan Beynəlxalq Bankı və «Kapital Bank»ın reytinqlərinə baxılacaq. Xatırladaq ki, ötən ay 4 Azərbaycan bankının reytinqlərinə baxılıb.