Maliyyə

Ana səhifə

Maliyyə

«Kövsər Bank»ın aktivləri son bir ildə 11% artıb

26 may 2009 13:33 (UTC +04:00)

Bakı. Elnur Hüseynquluyev – APA-Economics. Azərbaycanın «Kövsər Bank» Səhmdar Kommersiya Bankının (ASC) aktivlərinin həcmi bu ilin aprel ayının 1-nə 16,843 mln. manat təşkil edib ki, bu da ötən ilin aprelin 1-nə olan göstəricidən 11% çoxdur.

Bankın baş ofisindən «APA-Economics»ə verilən məlumata görə, hesabat dövründə bankın depozit portfeli 33% artaraq 2,479 mln. manata, məcmu kapitalı 2% artaraq 10,239 mln. manata, o cümlədən nizamnamə kapitalı 6% artaraq 10,020 mln. manata çatıb.

Qeyd edək ki, son bir il ərzində bankın gəlirləri 4,8 dəfə azalaraq 0,157 min manat, xərcləri isə 4,5 dəfə azalaraq 0,145 min manat olub. Nəticədə, bankın mənfəəti 7,7 dəfə azalaraq 0,012 min manata düşüb.

Həmçinin, bu müddət ərzində bankın ümumi vergi ödənişlərinin həcmi 83,3% artaraq 22 min manat, işçilərinin sayı 7,7% azalaraq 24 nəfər təşkil edib.

Xatırladaq ki, «Kövsər Bank» ASC 1989-cu ildən «Universal Bank» kimi yaradılıb. Bank 2003-cü ildən İslam Bankları Assosiasiyasının (İBA), o cümlədən İslam Bankları və Maliyyə İnstitutlarının Audit və Mühasibat Təşkilatının üzvüdür.

Bankın hazırda respublika üzrə 2 filialı, 1 mübadilə məntəqəsi fəaliyyət göstərir. Cari ilin aprel ayının 1-nə banın işçilərinin sayı 25 nəfər təşkil edir.