Maliyyə

Ana səhifə

Maliyyə

İyunun əvvəlində Azərbaycanda ipoteka istiqrazlarının ilk emissiyasını qeydiyyata alınacaq

27 may 2009 10:54 (UTC +04:00)

Bakı. Nicat Mustafayev – APA-Economics. Azərbaycan Qiymətli Kağızlar üzrə Dövlət Komitəsi (QKDK) bu ilin iyun ayının əvvəlində ipoteka istiqrazlarının ilk emissiyasını dövlət qeydiyyatından keçirəcək. «APA-Economics»in məlumatına görə, bunu QKDK-nın sədri Rüfat Aslanlı bildirib.

R.Aslanlının sözlərinə görə, mayın 26-da Azərbaycan İpoteka Fondu (AİF) ilə Milli Depozit Mərkəzi (MDM) arasında münasibətlərin rəsmiləşdirilməsina dair sənədlər hazırlanıb: «Sonra bizə emissiya prospekti təqdim olunmalıdır. Mayın sonunadək istiqrazların buraxılması üçün AİF və MDM arasında sənədlərin rəsmiləşdirilməsi prosedurası başa çatacaq. Gələn həftə isə emissiya prospektini təsdiq edərək ipoteka istiqrazlarının bazara buraxılmasına hazırlıq işlərini tamamlayacağıq».

Qeyd edək ki, yeni alətin qiyməti bazarda tələb və təklif əsasında müəyyənləşəcək. Ümumiyyətlə, istiqrazlar ipotekanın qiymətli kağızlar vasitəsilə yenidən maliyyələşdirilməsi, onun davamlılığını təmin edəcək. Qiymətli kağızlar bazarına çıxarılacaq ipoteka istiqrazları stimullaşdırıcı rol oynayacaq.

Xatırladaq ki, hazırda Azərbaycanın qiymətli kağızlar bazarında Maliyyə Nazirliyinin istiqrazları, Mərkəzi Bankın notları, korporativ istiqrazlar, veksellər, səhmlər və bu kimi digər alətlər mövcuddur.