Maliyyə

Ana səhifə

Maliyyə

«Moody’s» agentliyi Azərbaycan Beynəlxalq Bankının reytinqlərinə yenidən baxacaq

27 may 2009 13:19 (UTC +04:00)

Bakı. Vahab Rzayev, Elmin İbrahimov – APA-Economics. «Moody’s Investors Service» beynəlxalq reytinq agentliyi Azərbaycan Beynəlxalq Bankının (ABB) milli valyutada uzunmüddətli reytinqin «Baa2», xarici valyutada subordinasiya olunmuş uzunmüddətli borc öhdəliyinin reytinqinin isə «Baa3» səviyyəsindən endirilməsi ilə bağlı baxış keçirəcək.

«APA-Economics»in BNE portalına (www.businessneweurope.eu) istinadən verdiyi məlumata görə, reytinqlərin yenidən baxılması zamanı banka sistemli dəstəyin səviyyəsi və böhranın dərinləşməsi şəraitində yardıma ehtiyac yarandığı təqdirdə Azərbaycan hökumətinin dəstək vermək qabiliyyətinin qiymətləndirilməsi əsasında aparılacaq. Bu qiymətləndirmə ilə ABB-nin aldığı sistemli dəstəyin ölkə hökumətinin yerli valyutada istiqraz reytinqinə uyğunlaşdırılmasına ehtiyacın olub-olmaması müəyyən olunacaq.

«Moody’s» agentliyinin ekspertləri ilkin olaraq hesab edirlər ki, ölkənin bank sistemində kredit risklərinin əhəmiyyətli dərəcədə artması, qeyri-qənaətbəxş və restrukturlaşdırılan kreditlərin həcminin iki rəqəmli həddədək yüksəlməsi, hökumətin xarici borcların ödənilməsi ilə bağlı bir neçə banka yardım etməsi və xaricdən cəlb edilən kreditlərin ümumi həcminin 2 mlrd. dollara çatması, bunun yarısının bu il ödənilməli olmasına baxmayaraq, bankın reytinqlərinin mümkün endirilməsi bir bənddən artıq olmayacaq.

Qeyd edək ki, «Moody’s» agentliyi 2008-ci ilin iyul ayında ABB-nin reytinq proqnozunu «sabit»dən «pozitiv»ə dəyişməklə, xarici valyutada qısamüddətli reytinqini «Not Prime», xarici valyutada uzunmüddətli reytinqini «Ba2», milli valyutada uzunmüddətli reytinqini «Baa2», milli valyutada qısamüddətli reytinqini «Prime-2 (P-2)», xarici valyutada subordinasiya olunmuş uzunmüddətli borc öhdəliyi reytinqini «Baa3» və maliyyə dəstəyi reytinqini «E+» səviyyəsində təsdiq edib.

Həmin vaxt agentlik öz hesabatında qeyd edib ki, ABB Azərbaycanda ilk bankdır ki, xarici valyutada reytinqinin proqnozu ölkə üzrə reytinqə bərabərdir və ABB-nin xarici valyutada uzunmüddətli reytinqi Azərbaycanın yalnız müstəqil reytinqi ilə saxlanılır.

Xatırladaq ki, Azərbaycan Beynəlxalq Bankının aktivlərinin həcmi 2009-cu ilin aprelin 1-nə 3 308,8 mln. manat, kredit portfeli 2 376,6 mln. manat, məcmu kapitalı isə 391 mln. manat təşkil edib. Cari ilin birinci rübündə Bank 30,4 mln. manat məbləğində xalis mənfəət əldə edib.

ABB 1992-ci ildən fəaliyyət göstərir, bankın nizamnamə kapitalında dövlətin iştirak payı isə 50,2% təşkil edir. Hazırda bankın respublika üzrə 36 filialı var.