Maliyyə

Ana səhifə

Maliyyə

Azərbaycanın 2008-ci il dövlət büdcəsinin gəlirləri 79%, xərcləri 77% artıb

29 may 2009 11:41 (UTC +04:00)

Bakı. Rəşad Süleymanov, Elbrus Seyfullayev – APA-Economics. Milli Məclisin bu gün keçirilən iclasında Azərbaycanın 2008-ci il dövlət büdcəsinin icrasına dair hesabatın müzakirəsi başlanılıb. «APA-Economics»in məlumatına görə, iclasda maliyyə naziri Samir Şərifov, iqtisadi inkişaf naziri Şahin Mustafayev və Hesablama Palatasının sədri Heydər Əsədov iştirak edir.

Maliyyə naziri S.Şərifov bildirib ki, 2008-ci ildə dövlət büdcəsinin mədaxil proqnozu 10 484 mln. manata qarşı 10 762,7 mln. manat icra olunub ki, bu da əvvəlki ilin analoji göstəricisindən 79,2% çoxdur. Büdcə gəlirlərinin ÜDM-ə nisbəti 28,3% təşkil edib ki, bu da əvvəlki illə müqayisədə 7,1 faiz bəndi çoxdur.

Ötən il dövlət büdcəsinin gəlirlərinin 52,9%-i Vergilər Nazirliyi, 10,3%-i Dövlət Gömrük Komitəsinin xətti ilə daxil olub. Dövlət Neft Fondundan daxilolmalar büdcənin 35,3%-ni təşkil edib. Beləliklə, Vergilər Nazirliyi tərəfindən 5 695,4 mln. manat daxil olub ki, bu da proqnozdan 5,9% çoxdur. Gömrük Komitəsi tərəfindən daxilolmalar proqnozu 0,1% üstələyərək 1 110,4 mln. manat təşkil edib. Neft Fondundan daxilolmalar isə proqnoza tam uyğun həyata keçirilib və 3,8 mlrd. manat olub.

Ötən il dövlət büdcəsinin xərcləri 11 060,6 mln. manat proqnoza qarşı 10 774,2 mln. manat təşkil edib ki, bu da əvvəlki illə müqayisədə 77% çoxdur. Dövlət büdcəsinin xərclərinin strukturunda iqtisadi təsnifata uyğun xərclər 4 428,6 mln. manat, sosial təyinatlı xərclər 1 909,4 mln. manat, təhsil xərcləri 979,7 mln. manat, səhiyyə xərcləri 346,2 mln. manat, sosial müdafiə və sosial təminat xərcləri 846,4 mln. manat, mədəniyyət, incəsənət, informasiya və digər kateqoriyalara aid edilməyən sahələr üzrə fəaliyyət xərcləri isə 140,2 mln. manat təşkil edib. Qeyd edək ki, büdcədən maliyyələşən müdafiə xərcləri 1 321,2 mln. manata, məhkəmə hakimiyyəti, hüquq-mühafizə və prokurorluq xərcləri isə 533,9 mln. manata bərabər olub.

Keçən il dövlət büdcəsində xarici dövlət borcu və öhdəliklərə xidmət göstərilməsi ilə bağlı xərclər üzrə nəzərdə tutulan 132,1 mln. manat proqnoza qarşı icra 97 mln. manat təşkil edib. Maliyyə Nazirliyinin hesabatına əsasən, xaricdən cəlb edilmiş kreditlər üzrə 2008-ci ildə nəzərdə tutulduğundan az istifadə edilib.

Hazırda qanun layihəsi deputatlar tərəfindən müzakirə olunur.