Maliyyə

Ana səhifə

Maliyyə

Azərbaycanda kreditlər bank aktivlərinin 68%-ni təşkil edir

01 iyun 2009 10:25 (UTC +04:00)

Bakı. Vahab Rzayev – APA-Economics. Azərbaycanda fəaliyyət göstərən kommersiya banklarının məcmu kredit portfelinin məcmu aktivlərində xüsusi çəkisi 2009-cu il mayın 1-nə 67,8% təşkil edib. Azərbaycan Mərkəzi Bankından “APA-Economics”ə verilən məlumatına görə, aprelin 1-nə bu göstərici 68,5% olub. Cari ilin may ayının 1-nə bankların məcmu aktivlərinin həcmi 8,999 mlrd. manat, məcmu kredit portfeli isə 6,102 mlrd. manat təşkil edib. Cari ilin əvvəlindən kredit portfelinin aktivlərdə xüsusi çəkisi 0,5 faiz bəndi azalıb, son bir ildə isə 1,6 faiz bəndi çoxalıb.
Göründüyü kimi, Azərbaycan bank sistemi üçün 66-68%-lik kreditlərin aktivlərdə xüsusi çəkisi son zamanlar normaya çevrilib. İnkişaf etmiş ölkələrdə bank investisiyaları keyfiyyət və kəmiyyət baxımından yüksək səviyyədə olduğuna görə, kreditlərin aktivlərdə 50-55%-lik paya sahib olması təhlükəli hədd kimi qiymətləndirilir. İnkişafda olan iri maliyyə bazarlarında isə, məsələn, Rusiyada bu hədd 70-75% təşkil edir. Bu səbəbdən, kreditlərin aktivlərdə 70%-ə yaxın xüsusi çəkiyə malik olması nəzəri baxımdan təhlükəli hədd kimi hesab oluna bilər, lakin Azərbaycanın xüsusiyyətləri, banklar üçün investisiya alətlərinin məhdud olması, fond bazarının istənilən səviyyədə inkişaf etməməsi, iqtisadiyyatın əsas sahələrdə rentabelliyinin aşağı, sərmayələrin qaytarılması müddətinin isə daha uzun olması və bu kimi s. amillər nəzərə alınaraq, hazırda müşahidə edilən 68%-lik səviyyə qənaətbəxş hesab oluna bilər.