Maliyyə

Ana səhifə

Maliyyə

Azərbaycanda kredit qoyuluşları artıb

02 iyun 2009 10:22 (UTC +04:00)

Bakı. Vahab Rzayev - APA-Economics. Azərbaycanda fəaliyyət göstərən banklar tərəfindən kredit qoyuluşlarının həcmi 2009-cu ilin aprel ayında ötən ilin müvafiq dövrü ilə müqayisədə 20,4% artaraq 6 278,4 mln. manat təşkil edib. Azərbaycan Mərkəzi Bankdan “APA-Economics”ə verilən məlumatına görə, özəl sektora qoyulan kreditlərin məbləği isə son bir ildə 19,2% artaraq mayın 1-nə 5 711,2 mln. manat təşkil edib ki, bu da ümumi kredit qoyuluşlarının 91%-ə bərabərdir.
Mərkəzi Bankın “2009-cu ilin aprel ayı üzrə kredit qoyuluşlarının vəziyyəti barədə” icmalına əsasən, eyni zamanda yeni verilmiş kreditlərin həcmi 2009-cu ilin yanvar-aprel aylarında 2 381,8 mln. manat təşkil edib ki, bu da ötən ilin müvafiq dövrü ilə müqayisədə 20,8% azdır. Aprel ayında cəmi kredit qoyuluşunun 97,2%-ni banklar tərəfindən verilən kreditlər, 2,8%-ni isə qeyri-bank kredit təşkilatlarının kreditləri təşkil edir. Ötən ilin müvafiq dövrü ilə müqayisədə banklar tərəfindən kredit qoyuluşları 20,3%, qeyri-bank kredit təşkilatlarının kreditləri isə 24,8% artıb. Qeyd edək ki, 2009-cu ilin aprel ayında kredit qoyuluşlarında özəl bankların payı 58,7%-ə bərabər olub.
Mayın 1-nə kredit portfelin əsas hissəsini qeyri-maliyyə müəssisələri olan hüquqi şəxslərə kredit qoyuluşları təşkil edir ki, burada ötən ilin müvafiq dövrünə nəzərən kredit qoyuluşları 22,9% artıb. Onun cəmi kredit qoyuluşunda xüsusi çəkisi 60,9%-ə bərabər olub:

(mln. man.)

	01.05.09	Xüsusi çəkisi (%)	01.05.08-ə dəyişmə (%)
Qeyri-maliyyə hüquqi şəxslər	3 826,1	60,9	+22,9
Ticarət və xidmət	1 263,8	20,8	-9,9
Energetika və təbii ehtiyatlar	344,2	7,2	-6,0
Kənd təsərrüfatı	353,5	5,8	+53,1
İnşaat və əmlak	646	10,6	+53,9
Sənaye və istehsal	499,7	8,2	+41,9
Nəqliyyat və rabitə	424,3	7,0	+76,0
Dövlət idarəetmə	0,7	0,01	+7 dəfə
Digər kredit əməliyyatları	294,1	4,8	+3 dəfə
Fiziki şəxslər	2 251,5	37,1	+12,8
*Cəmi*	*6 077,6*	*100*	*+19*

* Göstəricilər vaxtı keçmiş kreditləri nəzərə alınmadan əks olunub

Göründüyü kimi, son bir ildə bankların kredit portfellərində tərkib hissələri üzrə çox müsbət dəyişikliklər baş verib. Yəni bank sistemi üzrə kredit portfelində real sektora aid sahələrə verilən kreditlərin artım tempi çox yüksək olub, eyni zamanda birbaşa istehsalatla bağlı olmayan sahələrdə, o cümlədən ticarət və xidmət sahələrinə qoyulan kreditlərin həcmi azalıb. Azalma, ümumilikdə, müsbət hal sayılmasa da, kənd təsərrüfatı, sənaye və istehsal, inşaat kimi real sahələrdə kredit qoyuluşların kəskin artım tempinin olması müsbət haldır.