Maliyyə

Ana səhifə

Maliyyə

«TBC Kredit» Müştərilərin Müdafiəsi üzrə beynəlxalq kampaniyaya qoşulub

02 iyun 2009 10:36 (UTC +04:00)

Bakı. Elnur Hüseynquluyev – APA-Economics. «TBC Kredit» qeyri-bank kredit təşkilatı Müştərilərin Müdafiəsi üzrə beynəlxalq kampaniyaya qoşulub. Təşkilatdan «APA-Economics»ə verilən məlumata görə, bu kampaniya Maliyyə Xidmətlərindən İstifadənin Genişləndirilməsi Mərkəzi (The Center for Financial İnclusion) tərəfindən keçirilir.

Qeyd edək ki, Müştərilərin Müdafiəsi üzrə Beynəlxalq Kampaniya bütün dünyada fəaliyyət göstərən maliyyə institutları tərəfindən 2009-cu ilin yazında gəlir səviyyəsi aşağı olan müştəriləri əlverişsiz maliyyə xidmətlərindən mühafizə etmək və onlara loyal xidmət göstərilməsini təmin etmək məqsədilə yaradılıb.

Kampaniya özündə müştərilərin müdafiəsi üzrə 6 prinsipi birləşdirir ki, bunlara da hədsiz borclanmanın qarşısının alınması, şəffaf və obyektiv qiymətqoyma, borcların toplanması üzrə loyal sistem, etik münasibət, şikayətlərin aradan qaldırılması üzrə səmərəli mexanizm və müştərilər haqqında məlumatların məxfiliyi daxildir.

Qeyd edək ki, «TBC Credit» 1999-cu ilin dekabrında «Shore Overseas Azerbaijan Credit» (SOA Credit) qeyri-bank kredit təşkilatı adı ilə yaradılıb.

SOA Credit qeyri-bank kredit təşkilatının brendi 2007-ci ilin may ayında dəyişərək «TBC Kredit» olub. Brendin dəyişməsi Gürcüstanın aparıcı bankı TBC Bankın təşkilatın yeni təsisçisi olması ilə əlaqədardır. Ötən ilin əvvəlində «SOA Credit»in nizamnamə kapitalındakı 75%-lik iştirak payı Gürcüstanın «TBC Bank»ına satılıb.

Cari ilin yanvar ayının 1-nə təşkilatın kredit portfelinin həcmi 18,5 mln. ABŞ dolları, məcmu kapitalı 10,80 mln. dollar, nizamnamə kapitalı 10 mln. dollar, müştərilərinin sayı 1336, işçilərinin sayı isə 66 nəfər təşkil edib.