Maliyyə

Ana səhifə

Maliyyə

Bakıda Azərbaycan-Qazaxıstan hökumətlərarası komissiyasının iclası keçirilib

01 oktyabr 2009 09:45 (UTC +04:00)

Bakı. Nicat Mustafayev – APA-Economics. Bu gün Bakıda Azərbaycan-Qazaxıstan iqtisadi əməkdaşlıq üzrə hökumətlərarası komissiyasının VI iclası keçirilib.

«APA-Economics»in məlumatına görə, tədbirdə çıxış edən komissiyanın Azərbaycan tərəfdən həmsədri, sənaye və energetika naziri Natiq Əliyev qeyd edib ki, komissiyanın iclasının Qazaxıstan prezidenti Nursultan Nazarbayevin Azərbaycana rəsmi səfəri ərəfəsində keçirilməsi olduqca əhəmiyyətlidir. İki ölkənin əsasən energetika sahəsində əməkdaşlıq etdiyini deyən N.Əliyev qeyd edib ki, Azərbaycan və Qazaxıstan digər sahələrdə də əməkdaşlıqlarını inkişaf etdirməlidir: «İki ölkə arasında 2008-ci ildə ticarət dövriyyəsi 490 mln. ABŞ dolları təşkil edib, cari ildə isə ticarət dövriyyəsinin əhəmiyyətli dərəcədə artması müşahidə olunmayıb. Lakin mövcud olan potensial iki ölkə arasında ticarət dövriyyəsinin artmasına imkan yaradır».

Azərbaycanın iqtisadi inkişafından danışan N.Əliyev bildirib ki, 2009-cu ilin ilk səkkiz ayında ölkədə ÜDM-in artım tempi 5% təşkil edib: «Qlobal maliyyə böhranı iqtisadiyyatın bütün sahələrinə təsir göstərsə də, Azərbaycana bir o qədər ziyan dəyməyib».

Komissiyanın Qazaxıstan tərəfdən həmsədri, energetika və təbii sərvətlər naziri Sauat Mınbayev isə Öz növbəsində iclasda irəli sürülən məsələlərin tezliklə həll olunacağına ümid etdiyini bildirib.

Qeyd edək ki, Azərbaycan-Qazaxıstan hökumətlərarası komissiyasının iclasının protokolunda iki ölkənin iqtisadi əməkdaşlıq məsələləri, o cümlədən, energetika, kənd təsərrüfatı, nəqliyyat, rabitə, humanitar kimi sahələr əhatə olunub və komissiya bu sahələrdə tərəflər arasında əlaqələrin inkişaf edirilməsini tövsiyə edib.

Xatırladaq ki, iclasın sonunda birgə bəyanat və iclasın yekunlarına dair protokol imzalanıb.