Maliyyə

Ana səhifə

Maliyyə

Bakıda beynəlxalq bankçılıq və maliyyə sərgi-konfransı keçiriləcək

23 fevral 2010 06:46 (UTC +04:00)

Bakı. Nicat Mustafayev – APA-Economics. Bu ilin aprel ayının 13-14-də Böyük Britaniyanın «ITE Group» şirkətinin Qafqazdakı eksklyuziv tərəfdaşı olan «Iteca Caspian» şirkətinin təşkilatçılığı ilə Bakıda VI Bankçılıq və Maliyyə Sərgi-Konfransı (Caspian Banking and Finance) keçiriləcək.

«Iteca Caspian»dan «APA-Economics»ə verilən məlumata görə, «Bankçılıq və Maliyyə» konfransında 200-dən yuxarı nümayəndə heyətinin iştirak edəcəyi gözlənilir. Konfransın əsas mövzusu qlobal iqtisadi böhran nəticəsində yaranan fəsadların Xəzər regionu ölkələrinin bank sisteminə təsiri olacaq. Konfransda həmçinin kommersiya bankları və müəssisələr üçün kapitalın səfərbər edilməsi üzrə alternativ və effektiv mənbələr qismində regional pul bazarları, habelə regional kapital bazarlarının inkişafı perspektivləri müzakirə olunacaq.

Bununla yanaşı, regionda gələcək bank sektoru modelinin formalaşdırılması mövzusuna ayrıcı bir sessiya həsr olunacaq. Bu il ilk dəfə olaraq alternativ bank sistemləri mövzusuna toxunulacaq. Belə ki, konfransın ikinci günü əsas müzakirə mövzularından biri «Böhran dövründə İslam bank fəaliyyəti prinsiplərinin yüksək effektivliyi və bunun üçün əsaslar» olacaq.

Ümumilikdə, konfransda Azərbaycan, Gürcüstan, Qazaxıstan, Rusiya, Ukrayna, Türkiyə və digər ölkələrin milli bankları, maliyyə nazirlikləri, bank assosiasiyaları və digər maliyyə strukturlarından dəvət olunmuş nümayəndələr, Avropa Yenidənqurma və İnkişaf Bankı (EBRD), Asiya İnkişaf Bankı (ADB), Beynəlxalq Maliyyə Korporasiyası (IFC), Qara Dəniz Ticarət və İnkişaf Bankı kimi maliyyə strukturları, eləcə də bir çox bank, sığorta və lizinq şirkətləri, investisiya bankları, konsaltinq, hüquq və auditor şirkətlərinin nümayəndələri iştirak edəcək.

Konfransla paralel «Bankçılıq və Maliyyə» sərgisi keçiriləcək ki, burada Azərbaycanın bir sıra bank və sığorta şirkətləri, o cümlədən banklar üçün xidmətlər təklif edən şirkətlər iştirak edəcək. Sərgi iştirakçılarına həmçinin Gürcüstan, Qazaxıstan, Rusiya, Türkiyə və digər ölkələrdən şirkətlər də qatılacaq. Sərgidə bank və maliyyə, sığorta, lizinq, investisiya, kapital bazarları, konsaltinq və audit kimi bölmələr fəaliyyət göstərəcək. Sərgiyə gələn qonaqlar Azərbaycan banklarının yeni təklifləri, güzəştli paketlər, kredit şərtləri ilə yaxından tanış olmaqla yanaşı, bank nümayəndələrindən ətraflı məsləhətlər də ala biləcək. Tədbirdə İT texnologiyalar sahəsinin mütəxəssisləri üçün maliyyə sektorunda informasiya sistemləri, bank texnologiyaları, banklar üçün proqramlaşdırma, bankomatlar və s. təqdim edən «BankTech» olacaq.

Qeyd edək ki, ümumiyyətlə, «Iteca Caspian» şirkəti 2010-cu ildə 16 sərgi və 2 konfrans keçirməyi planlaşdırır.