Maliyyə

Ana səhifə

Maliyyə

«Turan Bank» nizamnamə kapitalını artırır

23 fevral 2010 07:16 (UTC +04:00)

Bakı. Nicat Mustafayev – APA-Economics. Azərbaycan Qiymətli Kağızlar üzrə Dövlət Komitəsi «Turan Bank» Açıq Səhmdar Cəmiyyətinin (ASC) adi sənədsiz adlı səhmlərinin emissiya prospektini dövlət qeydiyyatına alıb.

Bakı Fond Birjasından (BFB) «APA-Economics»ə verilən məlumata görə, səhmlərin hər birinin nominal dəyəri 1 000 manat, sayı 1 500 ədəd, emissiyanın ümumi həcmi isə 1,5 mln. manat təşkil edir. Emissiyanın kütləvi təklif üsulu ilə BFB vasitəsilə yerləşdirilməsi planlaşdırılır.

Birja mütəxəssislərinin fikrincə, «Turan Bank» ASC artıq yaxın vaxtlarda səhmlərin yerləşdirilməsinə başlayacaq. Emissiyanın yerləşdirilməsi uğurla başa çatacağı təqdirdə, bankın nizamnamə kapitalı 88,2% artaraq 32 mln. manata çatacaq.

Xatırladaq ki, təsisçisi 5 hüquqi (21,8%) və 20 fiziki şəxs olan (78,2%) «Turan Bank» SKB 1992-ci ildən fəaliyyət göstərir. Bu ilin yanvar ayının 1-nə bankın aktiflərinin həcmi 109,938 mln. manat, kredit portfeli 77,916 mln. manat, depozit portfeli 35,880 mln. manat, məcmu kapitalı 20,344 mln. manat, o cümlədən nizamnamə kapitalı 17 mln. manat təşkil edib. Hazırda bankın respublika üzrə 11 filialı, 9 banklımatı və 73 POS-terminalı fəaliyyət göstərir.