Maliyyə

Ana səhifə

Maliyyə

Azərbaycan Qiymətli Kağızlar üzrə Dövlət Komitəsinin sədri BVF-nin missiyasını qəbul edib

25 fevral 2010 08:23 (UTC +04:00)

Bakı. Vahab Rzayev – APA-Economics. Azərbaycan Qiymətli Kağızlar üzrə Dövlət Komitəsində (QKDK) xanım Ninke Oomesin rəhbərlik etdiyi Beynəlxalq Valyuta Fondunun (BVF) missiyası ilə görüş keçirilib. Komitədən «APA-Economics»ə verilən məlumata görə, görüşün əsas məqsədi Azərbaycan hökuməti ilə BVF arasında mövcud saziş çərçivəsində təklif edilən tövsiyələr əsasında qiymətli kağızlar bazarına dair yeni əməkdaşlıq imkanlarının müəyyən edilməsindən ibarət olub.

Görüşdə QKDK-nın sədri Rüfət Aslanlı Azərbaycan iqtisadiyyatının dünyada hökm sürən maliyyə və iqtisadi böhrana qarşı dayanıqlıq nümayiş etdirməsi, ölkənin maliyyə sektorunun, xüsusən də qiymətli kağızlar bazarının inkişaf meylləri və həyata keçirilən tədbirlər barədə ətraflı məlumat verib. Bundan başqa, QKDK-nın qiymətli kağızlar bazarında apardığı tənzimləyici siyasət, daxili və xarici investorların bazara marağının artırılmasına dair aparılan işlər, təklif və tələbatın tarazlaşdırılmasına yönəldilən fəaliyyətin təkmilləşdirilməsi, dövlət qiymətli kağızlar bazarının stimulaşdırılması, qiymətli kağızlar bazarında əhalinin məlumatlılığının artırılması və maarifləndirmənin gücləndirilməsi məqsədilə 2009-2011-ci illər üçün hazırlanmış konsepsiya sənədindən irəli gələn təşəbbüslər müzakirə edilib.

N.Oomes səfəri çərçivəsində BVF-nin Azərbaycanla əlaqələrinin daha da inkişaf etdirilməsində maraqlı olduğunu, QKDK tərəfindən qiymətli kağızlar bazarında uğurlu iqtisadi siyasətin həyata keçirildiyini qeyd edərək, görülən işlərin potensial investorların Azərbaycanın kapital bazarına cəlb edilməsi üçün faydalı olacağına ümid etdiyini bildirib.