Maliyyə

Ana səhifə

Maliyyə

Azərbaycanda kredit bürolarının yaradılması ilə bağlı hazırlıq işləri görülür

26 fevral 2010 08:22 (UTC +04:00)

Bakı. Nicat Mustafayev – APA-Economics. Dünya Bankı Qrupunun üzvü olan Beynəlxalq Maliyyə Korporasiyası (IFC) Azərbaycanda özəl kredit bürolarının yaradılmasına kömək edir. IFC Azərbaycan Mərkəzi Bankı (AMB) ilə birgə kredit bürosunun üstünlükləri və ölkədə dövlət strukturları və maliyyə sektorunun nümayəndələrindən təşkil olunmuş ilk özəl kredit bürosunun yaradılması ilə bağlı məsələləri müzakirə etmək üçün dəyirmi masa keçirib.

«APA-Economics»in məlumatına görə, tədbirdə «Kredit bürosu haqqında» qanun layihəsi təqdim olunub və kredit bürolarının tənzimlənməsinə dair qabaqcıl təcrübə, o cümlədən ölkədə kredit məlumatı mübadiləsi strukturu və sistemlərinin inkişafı müzakirə edilib. Nəticədə, dəyirmi masa iştirakçıları ölkədə özəl kredit bürosunun yaradılmasına dair işçi qrupunu təşkil etmək qərarına gəliblər.

AMB-nin İdarə Heyəti sədrinin I müavini Alim Quliyev qeyd edib ki, Mərkəzi Bank borcalanların qiymətləndirilməsi mexanizmlərinin təkmilləşdirilməsində, banklarda və digər kredit təşkilatlarında kredit məlumatı mübadiləsi sisteminin yaradılmasında, həmçinin kreditorlar və borcalanlar arasında şəffaf və etibarlı kredit münasibətlərinin yaradılmasında maraqlıdır: «Biz maliyyə sektorunu və bu məqsədlərə qulluq edən IFC-nin layihəsini dəstəkləməyə hazırıq».

Layihə rəhbəri Anastasiya Maryina isə vurğulayıb ki, maliyyə infrastrukturunun tərkib hissəsi olan kredit bürosu əhalinin və kiçik sahibkarların kreditlərə çıxış imkanlarının artırılmasında mühüm rol oynayır. «Ümid edirik ki, ölkədə ilk özəl kredit bürosunun yaradılmasına dair işçi qrupu kredit məlumatı mübadiləsinin təşviq edilməsində və nəticədə, ölkədə kreditə çıxış imkanlarının artırılmasında aparıcı rol oynayacaq».

Bu təşəbbüs İsveçrə hökuməti tərəfindən maliyyələşdirilən Azərbaycanda və Orta Asiyada maliyyə infrastrukturunun təkmilləşdirilməsi üzrə məsləhət xidmətləri Layihəsinin bir hissəsidir. Layihənin məqsədi effektiv kredit məlumatının mübadiləsi sistemini yaratmaq və maliyyə təşkilatlarının əməkdaşları üçün risklərin idarə edilməsi sahəsində peşəkar sertifikatlaşdırma proqramını tətbiq etməkdir. Eyni zamanda, layihə kredit məlumatının mübadiləsi sisteminin üstünlükləri, o cümlədən risklərin idarə edilməsi barədə ictimaiyyətin məlumatlılıq səviyyəsini artırmağa kömək edir.