Maliyyə

Ana səhifə

Maliyyə

İqtisadi Əməkdaşlıq və İnkişaf Təşkilatı: G7 ölkələrinin məcmu ÜDM-nin artım tempi aşağı düşəcək

07 aprel 2010 15:15 (UTC +04:00)

Bakı. Nicat Mustafayev - APA-Economics. Bu ilin I rübündə G7 ölkələrinin məcmu ÜDM-nin artım tempi 2009-cu ilin IV rübü ilə müqayisədə bir qədər aşağı düşəcək.

«APA-Economics»in məlumatına görə, bu proqnozu İqtisadi Əməkdaşlıq və İnkişaf Təşkilatı verib.

Proqnoza əsasən, cari ilin ilk üç ayında G7 ölkələrində (ABŞ, Kanada, Yaponiya, Böyük Britaniya, Fransa, İtaliya, Almaniya) ÜDM-nin artım tempi 1,9% təşkil edəcək. Yalnız II rübdə bu göstərici 2,3%-ə çatacaq ki, bu da 2009-cu ilin IV rübü (+3,7%) ilə müqayisədə azdır.

Ayrı-ayrı ölkələrə gəldikdə, ən pis göstəricinin Almaniyada qeydə alınacağı gözlənilir. Belə ki, bu ölkənin ÜDM-nin I rübdə 0,4% azalacağı, II rübdə isə 2,8% artacağı proqnozlaşdırılır.

Kanadada 2009-cu ilin IV rübündə ÜDM-nin artım tempi 5,8% təşkil edib. Cari ilin I rübündə isə bu göstəricinin 6%, II rübündə 4,5% təşkil edəcəyi gözlənilir. Bu da G7 ölkələri arasında ən yüksək göstəricidir.

ABŞ-da 2009-cu ilin IV rübündə ÜDM-nin artım tempi 5,6% olduğu halda, 2010-cu ilin I rübündə 2,4%, II rübündə isə 2,3% olacağı proqnozlaşdırılır.

Yaponiyada bu göstəricinin I rübdə 1,1%, II rübdə isə 2,3% təşkil edəcəyi gözlənilir.