Maliyyə

Ana səhifə

Maliyyə

İTM: Cari ilin yanvar-mart aylarında Azərbaycanda inflyasiya 2,44% olub

08 aprel 2010 12:17 (UTC +04:00)

Bakı. Elnur Hüseynquluyev - APA-Economics. İqtisadi Tədqiqatlar Mərkəzi (İTM) “Alternativ inflyasiya səviyyəsinin hesablanması və modellərin işlənilməsi” layihəsi çərçivəsində Azərbaycanın 22 regionunda 2010-cu ilin mart ayı ərzində apardığı qiymətlərin statistik müşahidəsinin nəticələrini açıqlayıb.

«APA-Economics»in məlumatına görə, tədbirdə İTM-in İdarə Heyətinin sədri Qubad İbadoğlu, İdarə Heyətinin sədr müavini Rasim Hüseynov və digər nümayəndələr iştirak ediblər.

R.Hüseynovun sözlərinə görə, cari ilin mart ayı ərzində Azərbaycanda istehlak qiymətləri 0,70% artıb. Bu dövrdə Bakıda qiymətlər 0,59%, regionlarda 0,82% yüksəlib. Cari ilin yanvar-mart aylarında isə ölkədə 2,44% inflyasiya olub. Ötən ilin mart ayına nisbətən ölkədə istehlak qiymətləri indeksi 6,41% artıb.

R.Hüseynov bildirib ki, cari ilin mart ayı ərzində ərzaq məhsulları üzrə ən çox bahalaşma yenə də meyvə-tərəvəzdə (6,23%), yağ məhsullarında (1,14%), ən çox ucuzlaşma isə qeyri-ərzaq məhsullarından geyim və ayaqqabılarda (0,91%) qeydə alınıb.

Daha sonra R.Hüseynov İTM-in ekspertləri tərəfindən Nazirlər Kabinetinin 30 aprel 2009-cu il tarixli qərarı ilə təsdiq olunmuş normativlər əsasında mart ayı üzrə istehlak səbətinin dəyərinin hesablandığını bildirib. Hesablamalara əsasən, mart ayında Azərbaycanda yaşayış minimumu adambaşına 156,71 manat (fevralda 148,8 manat) təşkil edib. O cümlədən əmək qabiliyyətli əhali üçün adambaşına minimum istehlak səbətinin dəyəri 147,71 manat (140,14 manat), pensiyaçılar üçün 136,11 manat (127,16 manat), 0-14 yaşlı uşaqlar üçün 186,30 manat (178,67 manat) təşkil edib. Mart ayında əmək qabiliyyətli əhali adambaşına ərzağa minimum 83,4 manat (79,37 manat), pensiyaçılar 77,68 manat (73,25 manat), 0-14 yaşlı uşaqların valideynləri isə 94,94 manat (89,79 manat) xərcləməli olub. Ay ərzində bazardakı qiymətlərlə əhalinin qeyri-ərzaq məhsullarına çəkdiyi minimum xərcləri işləyən əhali üçün 39,01 manat (35,33 manat), pensiyaçılar üçün 36,05 manat (31,53 manat), 0-14 yaşlı uşaqlar üçün 73,8 manat (71,32 manat), xidmət xərcləri isə dəyişməz qalaraq müvafiq olaraq 25,3 manat, 22,38 manat və 17,56 manat təşkil edib.

Xatırladaq ki, Milli Məclisin qərarı ilə Azərbaycanda 2010-cu il üçün yaşayış minimumu 87 manat, əmək qabiliyyətli əhali üçün 96 manat, pensiyaçılar üçün 68 manat, uşaqlar üçün 72 manat məbləğində müəyyən edilib.