Maliyyə

Ana səhifə

Maliyyə

“MBASK” sığorta şirkəti “Azərbaycanda sığorta mədəniyyəti” adlı müsabiqə keçirir

09 aprel 2010 08:18 (UTC +04:00)

Bakı. Elnur Hüseynquluyev - APA-Economics. Azərbaycanın “MBASK” sığorta şirkəti bu gündən jurnalistlər arasında sığorta haqqında ən yaxşı nəşr üzrə «Azərbaycanda sığorta mədəniyyəti» adlı üçüncü müsabiqəyə start verib.

Şirkətin baş ofisindən «APA-Economics»ə verilən məlumata görə, müsabiqənin məqsədi KİV-də sığortalama problemlərinin daha tam və obyektiv işıqlandırılmasına yardım etmək, həmçinin sığorta xidmətlərini populyarlaşdırmaqdır. Müsabiqədə iştirak üçün çap və elektron KİV-də işləyən və sığorta sahəsində baş verən prosesləri işıqlandıran jurnalistlər iştirak edə bilər.

Müsabiqəyə milli çap və elektron KİV-də bu ilin aprel ayının 10-dan cari ilin iyun ayının 10-na qədər olan dövrdə istənilən üslub, ölçü və həcmdə nəşr olunan işlər qəbul olunur. Müsabiqəyə təqdim olunan materiallar cəmiyyəti sığorta biznesi sahəsindəki mövcud vəziyyət haqqında obyektiv olaraq məlumatlandırmalı, bu sahədəki aktual problemlərin aradan qaldırılmasına yardım etməli, oxucuları yeni sığorta məhsulları haqqında bilgiləndirməlidir.

Birinci yerin sahibi (1 nəfər) 500 manat, ikinci yerin sahibi (2 nəfər) 250 manat və üçüncü yerin sahibi (3 nəfər) 100 manat əldə edəcək. Pul mükafatından başqa əlavə mükafatlar da təqdim olunacaq.

Müsabiqənin Ekspertlər Şurasına (münsiflər heyəti) sığorta sahəsinin, dövlət orqanlarının nümayəndələri, jurnalistlər və müstəqil ekspertlər daxil olacaq.

Müsabiqənin Təşkilat Komitəsi müsabiqənin yekun vurulduğu gündən etibarən iki həftə ərzində onun nəticələri haqqında kütləvi informasiya vasitələrini və müsabiqə iştirakçılarını məlumatlandıracaq.

Müsabiqənin laureatlarına mükafatlar təntənəli şəraitdə təqdim olunacaq. Yer haqqında müsabiqə iştirakçıları əlavə olaraq məlumatlandırılacaqlar.