Maliyyə

Ana səhifə

Maliyyə

«Unileasing» sifarişlə lizinq xidmətləri göstərməyə başlayıb

11 may 2010 07:22 (UTC +04:00)

Bakı. Vahab Rzayev – APA-Economics. Azərbaycan lizinq bazarının aparıcı iştirakçılarından olan «Unileasing» şirkəti ABŞ və Almaniyadan lizinq vasitəsilə sifarişlə avtomobil, avadanlıq, texnikanın alınması ilə bağlı yeni layihə həyata keçirməyə başlayıb. Şirkətdən «APA-Economics»ə verilən məlumata görə, yeni layihə çərçivəsində istənilən şəxs ABŞ və ya Almaniyada istehsal edilən lazımi obyekti seçə və onu həmin ölkələrdən lizinq vasitəsilə əldə etmək üçün sifariş verə bilər.

Şirkətin Lizinq əməliyyatları Departamentinin rəhbəri Hikmət İbrahimovun sözlərinə görə, bu yenilik minik avtomobilləri, yük avtomobilləri, tikinti texnikası, sənaye avadanlığı, tibbi avadanlıq və yuxarıda qeyd edilmiş ölkələrin digər istehsal obyektlərini əldə etməyə imkan verir. «Pilot layihənin həyata keçirilməsinə başlandığı andan «Unileasing» şirkətinin mütəxəssisləri tərəfindən 2 mln. dollara yaxın məbləğdə ABŞ istehsalı olan 30-dan artıq minik avtomobili və 10-dan artıq tikinti texnikası, eləcə də məbləği 3 mln. dollarlıq olan Almaniya istehsalı sənaye avadanlığının alınmasını maliyyələşdirib. Bütün bunlar layihənin yerli bazarda böyük potensiala malik olduğunu göstərir», - deyə H.İbrahimov bildirib.

Layihədə iştirak etmək istəyənlər ABŞ/Almaniya istehsalı olan lazımi istehsal obyektini seçərək, onun qeyd olunan ölkələrin ərazisində satış şərtlərini dəqiqləşdirə və www.resale.az saytında xüsusi formanı doldurmaqla maliyyələşdirmə üçün sifariş verə bilər.

Qeyd edək ki, «Unileasing»in 2010-cu ilin I rübündə əldə etdiyi mənfəətin həcmi 500 min ABŞ dolları təşkil edib. Şirkət tərəfindən maliyyələşdirilən obyektlərin məcmu dəyəri 6,5 mln. dollara bərabər olub. Ümumilikdə, aprelin 1-nə şirkətin lizinq portfeli 42 mln. dollara çatıb.